Тожикистон ҳукумати терактларда ҳалок бўлган ёки аксилтеррор амалиётлари давомида ўлдирилган террорчиларни дафн этишнинг янги қоидаларини тасдиқлади – энди уларнинг жасадлари қариндошларига берилмайди. Бу ҳақда “Озоди” хабар бермоқда.
Хабарга кўра, ҳужжат 28 апрелда қабул қилинган, Адлия вазирлиги уни 5 майда давлат рўйхатидан ўтказган, бироқ расмий очиқ манбаларда эълон қилинмаган. “Озоди” ҳукумат қарорининг нусхасини 22 май куни олишга муваффақ бўлган.
Янги қоидаларга кўра, дафн қилувчи маҳаллий ҳокимият ва ташкилотлар террорчиларнинг жасадларини тергов органлари кўрсатган ерга кўмишлари шарт. Жасадлар дафн жойига ёпиқ тобутларда етказилади. Дафн қилинган жой ҳақида кимгадир айтиш тақиқланади.
Дафн этиш китобида террорчининг фамилияси, исми, отасининг исми, туғилган ва вафот этган санаси, шунингдек, қабрининг рақами ёзилмайди. Ҳужжатда фақат дафн этилган сана, ўлим тўғрисидаги тиббий маълумотномани ким бергани, шунингдек, дафн этишни амалга оширган ташкилотнинг номи ва манзили кўрсатилади.
Аксилтеррор операцияси чоғида ҳалок бўлган чет элликлар ва фуқаролиги бўлмаган шахсларнинг ўлими тўғрисида тегишли давлатларнинг дипломатик ваколатхоналари ёки консуллик муассасалари Тожикистон Ташқи ишлар вазирлиги орқали хабардор қилинади.
Аввал республика расмийлари аксилтеррор амалиётлари чоғида ҳалок бўлганларни қариндошларига дафн қилишга рухсат берар эди. Дафн маросимида одатда марҳумнинг чекланган миқдордаги қариндошлари қатнашган, жасадлар ҳуқуқ-тартибот идоралари назорати остида ўликхонадан қабристонга етказилган.
Тожикистон расмийлари вақти-вақти билан террорчилар ҳибсга олингани ҳақида хабар бериб келади, шунингдек, турли махсус операциялар давомида ўлдирилган фуқароларни терроризмга алоқадорликда айблайди. Халқаро инсон ҳуқуқлари ташкилотлари ва Ғарб давлатлари Тожикистон ҳукуматини экстремизм ва терроризмга қарши кураш баҳонасида фуқаролик жамияти фаоллари ва диссидентларга қарши репрессияларни кучайтираётганликда айблаб келади.
Изоҳ (0)