Самарқандда якшанба куни телефонини кўтармаган Ёшлар агентлиги ходимлари тушунтириш хати ёзди. Алишер Саъдуллаев ҳолатга изоҳ берди

Ёшлар ишлари агентлигининг Самарқанд вилояти бошқармаси бошлиғи Ҳусан Тўхтаев якшанба куни телефон қўнғироғига жавоб бермаган ходимлари — агентликнинг Пахтачи ва Каттақўрғон тумани бўлими бошлиқларидан тушунтириш хати олди. Бу ҳақда жамоатчиликка дастлаб самарқандлик журналист ва блогер Фарҳод Норбўтаев хабар берди. “Дарё” мазкур вазиятни ўрганди.

Таҳририят журналисти билан суҳбатда бўлган Ёшлар ишлари агентлигининг Пахтачи ҳамда Каттақўрғон тумани бўлими бошлиқлари раҳбарининг дам олиш куни қилган телефон қўнғироғига жавоб бермагани учун тушунтириш хати ёзганини тан олди.

“Мендан якшанба куни нега телефонингиз ишламади деб сўрашди. Изоҳлаш учун ўз хоҳишим билан тушунтириш хати ёзиб бердим”, — деди “Дарё” журналистининг бу ҳақдаги саволларига жавоб берган агентликнинг Каттақўрғон тумани бўлими раҳбари Лазизбек Абдуқаҳҳоров.

Тушунтириш хати ёзган иккинчи масъул — агентликнинг Пахтачи тумани бўлими раҳбари Элёрбек Санақулов эса ундан тушунтириш хати сўраган масъулдан ҳуқуқини талаб қилганини, “шугина сабаб учун тушунтириш хати ёзишим шартми”, деб савол берганини билдирмоқда.

“Бир неча ойдан бери якшанба кунига шахсий ишларимни режа қилиб қўйгандим. Шу сабаб дам олиш куни тоғли ҳудудда бўлганим боис, телефоним ишламай қолди. ‘Шугина сабаб учун ҳам тушунтириш хати ёзишим шартми’, деб сўрадим. Отделкадр ‘раҳбар талаб қиляпти, ёзинг’, дегач ёзиб бердим”, — дейди Элёрбек Санақулов.

Элёрбек Санақуловнинг қўшимча қилишича, бошқарма бошлиғи якшанба куни Пахтачи туманига таъзияга борган бўлган.

Ҳолат ҳақида жамоатчиликка ошкор қилган журналист ва блогер Фарҳод Норбўтаев ҳам таъзия масаласида алоҳида тўхталган ва таъзиядан чиққан раҳбарнинг балиқ егиси келганини ёзган.

“Биттаси айтяпти, жигит таъзиядан қайтаётган бўлган. Тўхта, битта балиқ еяй деган. Пахтачидан одамини излаган топмаган. Сўнг Каттақўрғондан одамини излаган. Уни ҳам тополмаган”, — деб ёзади мазкур воқеа давомини ёзган муаллиф.

“Мансабдор ходимларини балиқхўрлик учун ҳам йўқлаган бўлиши мумкин. Аммо бу тахмин дейди”, — журналист Фарҳод Норбўтаев “Дарё” журналисти билан бу ҳақда суҳбатлашар экан.

Ёшлар ишлари агентлигининг Самарқанд вилояти бошқармаси ахборот хизмати раҳбари Чарос Саидова журналистнинг бу гапини инкор этиб, раҳбари ўша куни уйида бўлганини маълум қилди.

“Бошқарма бошлиғи ўша куни уйда бўлган. Маълумотларни тўплаётганда шу икки туман билан боғлиқ тезкор маълумот керак бўлиб қолган. Ва шу сабаб агентликнинг икки раҳбарини излаган ва телефон қилган. Тополмагач, душанба куни нега телефони ишламагани сабабини сўраган. Бунга жавобан икки туман масъули тушунтириш хати ёзиб берган. Аммо улардан тушунтириш хати сўралмаган”, — дейди Чарос Саидова.

Ёшлар ишлари агентлиги директори Алишер Саъдуллаев “Дарё”нинг бу ҳақдаги сўровига жавоб берар экан, мазкур ҳолатда бошқарма бошлиғи ҳам, туман бўлими раҳбарлари ҳам хато қилганини айтмоқда.

“Бу ҳолат жамоатчиликни қизиқтириб, тармоқларда кенг муҳокама қилинганини кўриб хурсанд бўлдим. Демак, биз ўз ҳақ-ҳуқуқимизни билиб, уни талаб қилишга ўтяпмиз. Ҳақиқатан ҳам дам олиш кунларида ишлаш, раҳбар талабини бажариш қонунга зид. Бошқарма бошлиғи қонунни бузган, тумандаги раҳбарларимиз ҳам бу ҳолатда ҳуқуқини талаб қилмай хато қилган. Улар ‘якшанба куни менинг дам олиш вақтим, шу сабаб ҳеч қачон тушунтириш хати ёзмайман’, деб жавоб бериши керак эди. Биз ҳар доим, барча ходимларимизга тушунтириб келганмиз. Дам олиш кунлари қонунга кўра, дам олиш, ҳеч кимни безовта қилманг деганмиз. Бундан хулоса чиқарганлари чиқаряпти. Хулоса қилишмаса, огоҳлантиряпмиз, ундаям қонунни бузишда давом этса, кейин чора кўришга мажбурмиз”, — дейди Алишер Саъдуллаев.  

Агентлик директорининг қўшимча қилишича, агенлик бу ҳолат юзасидан тез орада расмий маълумот ҳам беради.