Арманистон Тоғли Қорабоғни Озарбайжоннинг бир қисми сифатида тан олишга тайёр, аммо Боку ҳудуддаги арманларнинг ҳуқуқлари ва хавфсизлигини таъминлаш бўйича мулоқот ўрнатиши керак. Бу ҳақда Арманистон бош вазири Никол Пашинян маълум қилди.
“Озарбайжоннинг 86,6 минг квадрат километр майдони таркибига Тоғли Қорабоғ ҳам киради. Аммо шуни аниқлаштириб олишимиз керакки, Тоғли Қорабоғдаги арманларнинг ҳуқуқлари ва хавфсизлик масаласи Степанакерт (Тоғли Қорабоғдаги шаҳар) ва Боку ўртасидаги мулоқотда муҳокама қилиниши лозим”, — деди Пашинян матбуот анжуманида.
Аввалроқ Пашинян Боку ва Ереваннинг совет чегаралари бўйича ҳудудий яхлитлигини ўзаро тан олиши республикалар ўртасида тинчлик ўрнатишнинг зарурий шарти эканини таъкидлаганди.
18 апрель куни Озарбайжон президенти Илҳом Алиев Тоғли Қорабоғнинг арман аҳолиси икки йўлдан бирини танлаши кераклигини айтган: Озарбайжон фуқаролигини қабул қилиш ёки яшаш учун бошқа жой топиш. 5 май куни Никол Пашинян Боку билан музокараларда “бир қатор номувофиқликлар” борлиги, хусусан, Тоғли Қорабоғ арманларининг хавфсизлиги ва ҳуқуқларини таъминлаш механизми ноаниқлигича қолаётгани ҳақида гапирди.
Изоҳ (0)