Тошкент шаҳар Яшнобод туманида фуқароларни дунёнинг турли мамлакатларига ишга юбориш билан алдаб келган фирибгар ушланди. Бу ҳақда ИИВ ахборот хизмати хабар берди.
Хабарга кўра, Фарғона вилояти, Қувасой шаҳрида яшовчи 35 ёшли Х.Т. ариза билан мурожаат қилиб, Telegram орқали “номаълум шахс” томонидан уни Швецияга ишга жўнатишини айтиб, алдов йўли билан банк картасидан 1 160 000 сўм пулларини қўлга киритганини айтган. Ушбу номаълум шахсга нисбатан қонуний чора кўришликни сўраган.
Ўтказилган тезкор-қидирув тадбирлари натижасида ушбу жиноятни Тошкент вилояти, Яшнобод туманида яшовчи 25 ёшли С.М. содир этгани аниқланди. С.М. Telegram’да “Чет элда иш” номли гуруҳ очиб, у ерда дунёнинг турли мамлакатларига ишга юборишни ваъда қилган. Фуқароларнинг банк картасига фирибгарлик йўли билан пулларни ўзлаштириб келган.
Жиноят содир этган С.М. Жиноят кодексининг 168-моддаси (фирибгарлик) 3-қисми “в” банди билан жиноий жавобгарликка тортилди. Қонунга мувофиқ, С.М. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
Изоҳ (0)