Футбол бўйича 20 ёшгача бўлган футболчилар ўртасидаги Жаҳон Чемпионати 20 май, шанба куни старт олади.
Очилиш ўйинида Ўзбекистон U-20 жамоаси мусобақа мезбони Аргентинага қарши майдонга тушади. Учрашув 20 май тунида, соат 02:00 да старт олади.
Мусобақа ҳақида
Дастлаб, 20 ёшгача бўлган ёшлар ўртасидаги Жаҳон Чемпионати Индонезияда ўтказилиши керак эди. Бироқ Индонезия аҳолиси мусобақада Исроилнинг иштирок этишидан норози бўлди. Ўйинларни қабул қиладиган айрим шаҳарлар раҳбарлари Исроилни ўз ҳудудига киргизмаслигини айтган. Шундан сўнг ФИФА мамлакатни мусобақа мезбонлигидан маҳрум қилди ва турнир Аргентинада ўтказиладиган бўлди.
Жанубий Америка мамлакати мезбонлик қилаётган турнир тарихдаги 23-турнир бўлади (илк бор 1977 йилда ўтказилган). Мусобақа ҳар икки йилда бир марта ўтказилади.
20 ёшгача бўлган футболчилар ўртасидаги мундиалда энг кўп ғолиблик айнан ҳозирги мезбонларга тегишли. Аргентина ёшлари мусобақада 6 марта зафар қучган.
Кичик Жаҳон Чемпионатида 24 та жамоа иштирок этади. Улар олтита гуруҳга бўлинган. Ўйинлар 2023 йилнинг 20 майидан 12 июнига қадар бўлиб ўтади.
Ўзбекистон терма жамоаси А гуруҳидан жой олди ва Аргентина, Янги Зеландия, Гватемала ёшларига қарши ўйин ўтказади. Қуйида Равшан Ҳайдаров шогирдларининг гуруҳдаги тақвими келтирилган.
Ўзбекистон ўз тарихида 5 марта U-20 Жаҳон Чемпионатида иштирок этмоқда
Ўзбекистон ёшлар терма жамоаси 2003 йилда илк бор мундиалда иштирок этган. B гуруҳида Аргентина, Испания ва Малига қарши баҳс олиб борган. Учала ўйинда ҳам мағлубиятга учраган ёшлар мусобақани гуруҳ босқичидаёқ якунлашга тўғри келган.
2009 йилда ҳам U-20 ёшлари гуруҳ босқичида ўз иштирокини якунлаган. D гуруҳида Уругвай, Англия ва Гана каби терма жамоаларга қарши ўйнаган ўзбекистонлик ёшлар фақатгина Англияга қарши баҳсда дуранг натижа қайд этган. Қолган иккита ўйинда рақибга мағлуб бўлган.
2013 йилда Ўзбекистон ёшлари ўз тарихида учинчи бор мундиалда иштирок этган. F гуруҳида Янги Зеландия (3:0), Хорватия (1:1), Уругвай (0:4) каби жамоалар билан ўйнаб, 4 очко жамғарган ҳолда плей-оффга йўл олган. Нимчорак финалда Греция 3:1 ҳисобида таслим этилган. Чорак финалда эса Франция Ўзбекистон дарвозасига жавобсиз 4 та гол урган.
2015 йил Янги Зеландияга бўлиб ўтган мундиалда Ўзбекистон гуруҳ босқичида Германия (0:3), Гондурас (3:4), Фижи (3:0) мамлакатлари билан баҳс олиб бориб, 3-ўрин билан плей-офф йўлланмасини ҳал қилди. Нимчорак финалда Австрия устидан 2:0 ҳисобида ғалаба қозонган ўзбекистонликлар чорак финалда Сенегалга 0:1 ҳисобида имкониятни бой берган.
Жамоалар мусобақага қандай етиб келди?
Равшан Ҳайдаров шогирдлари мусобақага Тошкентда ўтказилган Осиё Кубоги ғолиби сифатида ташриф буюрмоқда.
Аргентина 2023 йилги Жанубий Америка U-20 чемпионати доирасида мундиал саралашидан ўта олмаган бўлса ҳам, Индонезия ўрнига мезбон мамлакат сифатида турнирга йўлланмага эга чиқди.
Мураббийларнинг учрашувдан аввалги фикрлари
Ўзбекистон U-20 жамоаси бош мураббийи Равшан Ҳайдаров Аргентинага қарши очилиш ўйини олдидан рақибнинг номи юзасидан босим йўқлигини ва шогирдлари олдига қўйилган мақсадларни айтиб ўтди.
Аргентина билан ўтган йили ҳам ўйнаганмиз. Уларни сўнгги ўйинларини таҳлил қилдик, кучли ва кучсиз томонларини ўргандик ва шунга яраша тайёргарлик олиб бормоқдамиз. Кучли рақиб, ном юзасидан ҳеч қандай босим йўқ. Чунки биз нафақат Аргентина, балки Уругвай, Бразилия билан ҳам ўйнаб, етарлича тажриба тўпладик.
Аввал ҳам Жаҳон Чемпионатларида иштирок этганмиз. Шу сабабли олдимизга олий мақсадни қўйганмиз, қолаверса, аввалги иштирокларимиздаги натижаларимизни яхшилашни ҳам мақсад қилганмиз. Болаларнинг иштиёқи баланд, уларда ўзларига нисбатан ишонч бор. Ўйлайманки, Жаҳон чемпионатига тайёрмиз.
Аргентина ёшлари мураббийи Хавьер Маскерано эса Ўзбекистон U-20 жамоаси жиддий рақиб эканини ва бўлажак ўйин қийин бўлишини айтди.
Ўзбекистон жуда яхши жамоа. Уларни билмайдиганлар ҳақида шуни айтишим мукинки, улар нима қилиш кераклигини яхши билади. Ўтган йили 5-3-2 схемасида ҳаракат қилган рақибимиз иқтидорли вингерларга эга ҳамда тўп назоратини яхши кўради. Улар яккакурашларда кучли, бу ҳақда шогирдларимни огоҳлантирганман.
Учрашув осон бўлмайди. Биз уларга қарши ўтган йилнинг сентябр ойида ўйнаганмиз. Рақиб жамоа таркибида баъзи номлар ўзгарган, аммо мақсад ўша-ўша: улар яхши ўйин кўрсатишга ва тўпни назорат қилишга ҳаракат қилади. Қийин бўлади.
Изоҳ (0)