“Уйда ўтиролмай таксичилик ҳам қилди” — Мурод Ражабовнинг рафиқаси актёрнинг тушкунликка тушгани, моддий қийинчиликлари ва армонлари ҳақида (фото)

Марҳум Ўзбекистон халқ артисти Мурод Ражабовнинг турмуш ўртоғи Нафиса Ражабова YouTube’даги “Меҳмон ТВ” каналига интервью берди. Суҳбат давомида у турмуш ўртоғининг сўнгги кунлари, 2015 йилдан кейин саломатлиги ёмонлашиб руҳий тушкунликка тушиб қолгани ҳақида сўзлаб берди. 

— Раҳматли турмуш ўртоғим билан 53 йил бирга яшадик. У инсон аслида жиддий ролларни ижро этадиган актёр эди. “Темир хотин” фильми муваффақият қозонганидан кейин режиссёрлар уни фақат комедик фильмларга таклиф этадиган бўлишди. Кўпчилик оиламизни бадавлат деб биларди. Чунки одамларнинг кўзига санъаткорлар жуда бой-бадавлат бўлиб кўринади. Мурод ака ўртаҳол оилада туғилган. Киноларда тушиб, халққа танилган пайтида ҳам жамоат транспортидан фойдаланарди. Автобусга чиққанида одамлар тезда таниб қолишарди. Шундан кейингина машина олишга қарор қилган. Ўшанда ҳам арендага машина олиб, ойма-ой пулини бўлиб тўлаб қутулганмиз. Баъзи инсонларга ўхшаб, нақд пул билан бориб, машина сотиб олишга имкониятимиз бўлмаган. Давлат фильмларида шартнома тузиб, гастрол сафарларига кетардилар. Аммо сёмкалар тугаб, уйга қайтгунларича гонорарнинг ярми сарфланиб бўларди. Чунки машҳурликнинг ҳам ўзига яраша талаблари бор. Кийимлари ва кундалик ҳаражатлари учун ҳам катта пул сарфланарди, — дейди Мурод Ражабовнинг турмуш ўртоғи.

Актёр ҳаётлик чоғида жуда кўп давлат ва хусусий фильмларда суратга тушган. Фаолияти давомида кўплаб машҳур ролларни ижро этган бўлишига қарамай, унинг ҳам армони бўлган экан.

— Турмуш ўртоғим “Гамлет” ролини ижро этишни орзу қиларди. Афсуски, унга бу бахт насиб этмади. Ижодий тажрибаси ортганида эса ёши анча катта бўлиб қолганди. “Ўзим ўйнамасам ҳам, шу спектаклни театр саҳнасига қайтараман”, деб жиддий аҳд қилганди. Ўзбек миллий академик драма театрида спектаклни саҳналаштирмоқчи ҳам бўлди. Аммо қандайдир сабабларга кўра орзусига етолмади, — дейди Нафиса Ражабова.

Нафиса Ражабова турмуш ўртоғи руҳий тушкунликка тушгани ва оқибатсиз шогирдлари ҳақида кўзига ёш олиб гапирди.

— 2015 йилдан кейин турмуш ўртоғимнинг саломатлиги жиддий ёмонлашди. Ҳар куни сёмка майдончасида бўлган инсон бирдан уйда ўтириб қолса, жуда қийин бўлар экан. Дардини билдирмасликка ҳаракат қиларди. Аммо ич-ичидан қийналаётганини сезиб турардим. Уйда ўтиролмай таксичилик қилган кунлари ҳам бўлди. 
Руҳий тушкунликка тушган инсонга атрофдагиларнинг эътибори ва қўллаб-қувватлаши керак бўларкан. Шогирдлари ҳақида гапириш мен учун жуда оғир. Боиси уларнинг кўпчилиги қийин вазиятда устозларининг олдига келишолмади. Матёқуб Матчоновга минг раҳмат. Мана шу инсон кўп марта келиб, дўстига руҳий мадад берди, — дейди Нафиса Ражабова.