Тожикистон президенти Хитойга давлат ташрифи давомида 17 май куни Пекинда Осиё инфратузилмавий инвестициялар банки раиси Жин Лисун билан мулоқот қилди. Учрашувда мазкур банк Роғун гидроэлектр станциясининг янги агрегатларини ишга тушириш учун 500 миллион доллар маблағ ажратиши маълум бўлди. Бу ҳақда Тожикистон президенти матбуот хизмати хабар берди.
Республика раҳбари Эмомали Раҳмон Осиё инфратузилмавий инвестициялар банки раисига миннатдорлик билдириб, мазкур банк Тожикистон учун ишончли шерик экани, бугунги мулоқот келгуси ҳамкорликларни янада кенгайишига туртки бўлишини таъкидлади.
Ушбу учрашувда томонлар яшил инфратузилма, транспорт, энергетика, коммунал хизматлар ва шаҳарларни ободонлаштириш соҳаларига сармоялар ажратиш бўйича ҳам фикр алмашди.
Осиё инфратузилмавий инвестициялар банки молиявий халқаро ташкилот бўлиб, Хитой томонидан таъсис этилган. Мазкур банк Осиё ва Тинч океан минтақаларидаги инфратузилмаларни яхшилаш, аэропортлар, йўллар, коммуникация станцияларини бунёд этиш каби лойиҳаларга сармоялар ажратади.
Эслатиб ўтамиз, бундан олдин Роғун ГЭСга қаратилган лойиҳалар ижросини таъминлаш учун Ислом тараққиёт банки жорий йилнинг 14 февралида 150 милллион доллар ажратганди.
Тожикистон энергетика вазирининг маълум қилишича, Роғун ГЭСни бутунлай ишга тушириш учун 5 миллиард доллар миқдорида маблағ керак бўлади. Ҳозиргача ушбу сув электростанцияси учун 40 миллиард сомони (3 миллиард 336 миллион доллар) сарфланган.
Чорёр Авлиёзода, Душанбе
Изоҳ (0)