Uzbekistan Airways авиакомпаниясининг Тошкент—Душанбе йўналиши бўйича HY717 сонли рейси Тошкент халқаро аэропортига қайтиб келди. Бу ҳақда Uzbekistan Airports матбуот хизмати хабар берди.
Қайд этилишича, самолётнинг қайтишига Душанбе аэропортидаги ноқулай об-ҳаво шароити (кучли шамол) сабаб бўлган.
Тошкент вақти билан соат 10:04 да самолёт учиш аэропортига келиб қўнган. Соат 11:31 да эса бортида 174 йўловчи бўлган самолёт яна Душанбе аэропортига учиб кетган.
“Ўзгидромет” Ўзбекистон ҳудудига 16–17 май кунлари Каспий денгизининг жанубий ҳудудларидан нам ҳаво, сўнгра Волга бўйи ҳудудларидан салқин ҳаво кириб келиши кутилаётганини маълум қилганди.
Март ойида Uzbekistan Airways авиакомпаниясининг Тошкентдан Термизга учган рейс ортга қайтарилган эди. 2022 йил сентябрь ойида эса HY-065 йўловчи рейси Термиз аэропортидаги ноқулай об-ҳаво шароити — кучли шамол ва чанг бўрони туфайли Бухоро шаҳридаги захира аэропортга йўналтирилганди.
Изоҳ (0)