Шавкат Мирзиёев Европа тикланиш ва тараққиёт банки Бошқарувчилар кенгашининг 32 йиллик йиғилишида иштирок этиш учун Самарқанд шаҳрига келди. Бу ҳақда Президент матбуот хизмати хабар берди.
Маълум қилинишича, давлат раҳбари йиғилиш ялпи сессиясида нутқ сўзлайди. Саммит ишида Европа тикланиш ва тараққиёт банки президенти Одил Рено-Бассо, Европа Комиссияси вице-президенти Валдис Домбровскис, ЕТТБ Бошқарувчилар кенгаши раиси Магнус Бруннер, хорижий ҳукуматлар, етакчи трансмиллий корпорациялар ва саноат холдинглари, халқаро молия институтлари ва банк раҳбарлари ва вакиллари, шунингдек, дунёнинг 70 та мамлакатидан иқтисодиёт, инвестициялар, молия ва инновациялар соҳаси экспертлари ва таҳлилчилари, фуқаролик жамияти фаоллари ва журналистлар — жами 2,5 мингдан зиёд иштирокчи қатнашмоқда.
Тадбир глобал иқтисодиёт истиқболларини кенг муҳокама ва чуқур таҳлил қилиш, унинг барқарор тараққиётини таъминлаш юзасидан тавсиялар ишлаб чиқиш учун муҳим платформадир.
Иқтисодиёт барқарорлигига сармоя киритиш, халқаро савдони рағбатлантириш, энергетик хавфсизликни таъминлаш ва қайта тикланувчи энергия манбаларини жорий этиш, рақамлаштиришни жадаллаштириш, молиявий инфратузилмани модернизация қилиш, кичик ва ўрта бизнесни қўллаб-қувватлаш, “яшил” иқтисодиёт дастурини илгари суриш масалалари форумнинг марказий мавзулари бўлади.
Тадбир доирасида давлат раҳбарининг хорижий делегация раҳбарлари билан қатор учрашувлар ўтказиши режалаштирилмоқда.
Таъкидланишича, ЕТТБ Ўзбекистондаги ижтимоий-иқтисодий ислоҳотлар дастурини илгари суришда фаол иштирок этмоқда.
“Мана уч йилдирки, Ўзбекистон ушбу етакчи молиявий институтдан жалб қилинган инвестициялар ҳажми бўйича минтақада етакчилик қилмоқда. Бугунги кунда Банк лойиҳаларининг портфели 3 миллиард евродан ошди, унда хусусий секторга инвестициялар улуши 55 фоиздан зиёдни ташкил қилмоқда”, — дейилади хабарда.
Самарқандда 16 май куни Европа тикланиш ва тараққиёт банки (ЕТТБ) Бошқарувчилар кенгашининг “Иқтисодий чидамлилик ва барқарорликка инвестициялар киритиш” мавзусидаги 32 йиллик йиғилиши бошланди. Ўзбекистон томонидан ушбу тадбирни ўтказиш учун ариза 2019 йилда берилган ва 2022 йилда тасдиқланган.
Изоҳ (0)