Афғонистон Миллий қаршилик фронти раҳбари Аҳмад Масъуд Афғонистон минтақавий ва халқаро терроризм марказига айланиб бораётгани ҳақида огоҳлантиради.
Аҳмад Масъуд Дания пойтахти Копенгагенда бўлиб ўтган халқаро демократия йиғилишида онлайн иштирок этиб, нутқ сўзлади. У Афғонистон “Толибон” ҳукмронлиги даврида минтақавий ва халқаро терроризм марказига айланганини айтди. Масъуднинг сўзларига кўра, Афғонистонга минтақа ва дунё учун жиддий хавф туғдирадиган минглаб террорчилар мамлакатга келиб ўрнашган, ҳозирда Афғонистонда 20 дан ортиқ террорчилик гуруҳлари фаолият юритмоқда.
Аҳмад Масъуд халқаро ҳамжамиятдан Афғонистон халқи ёнида бўлишни сўради.
Аввал Аҳмад Масъуд “Толибон” ҳукуматини тан олиш шартини маълум қилганди. “Одамлар қандай куч ва тизимни хоҳлашларини ўзлари танласин. Агар ‘Толибон’ сайловлар натижасида ҳокимият тепасига келса, мен уларни қабул қиламан”, — деган қаршилик фронти етакчиси.
Миллий қаршилик фронти 2021 йилнинг сентябридан буён толибларга қуролли қаршилик кўрсатиб келмоқда. Дастлаб у Панжшер вилоятидаги тожиклардан иборат лашкарлар ва толибларга мағлуб бўлган Афғонистон ҳукумати ҳарбий хизматчиларидан иборат эди.
Изоҳ (0)