Дунёнинг 180 мамлакати орасида Афғонистон секин интернет тезлиги бўйича иккинчи ўринни эгаллаган.
Афғонистон фуқароларига “Afgʻon Wireless”, “Рошан”, “МТН” ва “Этсалат” номли 4 та хусусий, “Салом” ва “Васл” номли 2 та давлат тармоқлари хизмат кўрсатади. Республиканинг шимолий вилоятларида одамлар интернет хизмати ҳолатидан шикоят қилмоқда. Жумладан, интернет-пакетларининг юқори нархига нисбатан унинг тезлиги жуда паст.
Балх вилояти журналистларидан бирининг “Дарё” мухбирига айтишича, у интернет хизматлари сифати пастлиги туфайли ўз медиа ишини бажаришда муаммоларга дуч келган. У ҳар ой икки мингга яқин афғони, яъни 22 доллар сарфлайди. Аммо интернет тезлиги шунчалик пастки, у янгиликларини ўз вақтида нашр эта олмайди.
Қуйида Афғонистон телекоммуникация тармоқларидан бирининг интернет нархи намуна сифатида берилган:
- 1 ГБ — 1,25 доллар;
- 2 ГБ — 2,50 доллар;
- 3 ГБ — 3,80 доллар;
- 4 ГБ — 5 доллар;
- 5 Гб — 6,30 доллар.
Балх вилоятида яшовчи Аҳмад Мунир ҳам интернет сустлигидан шикоят қилган. У
“Толибон” ҳукуматидан телекоммуникация тармоқлари одамларнинг пулларини турли йўллар билан ўғирлаётганига эътибор қаратишни сўраган.
“Бироқ интернет сифати ва тезлиги ҳақида ҳеч қандай янгилик йўқ”, — дейди у ва ҳар ойда SIM картасини алмаштиришдан чарчаганини айтган.
Интернет пастлиги афғон халқи учун, айниқса, “Толибон” томонидан қизлар таълими тақиқланганидан кейин онлайн ёки масофавий таълимга ўтган бир қатор афғон қизлари учун катта муаммога айланди.
Афғонистоннинг шимолий вилоятлари аҳолиси “Толибон” ҳукуматининг Алоқа ва ахборот технологиялари вазирлиги расмийлари Афғонистон шимолидаги интернет хизматлари ҳолатига жиддий эътибор қаратиши кераклигини таъкидламоқда.
Маълумотларга кўра, Афғонистонда интернет нархи Ўзбекистон, Тожикистон, Эрон ва Покистон каби қўшни давлатларга нисбатан жуда қиммат бўлса-да, тезлиги унчалик юқори эмас.
Шу сабабли телекоммуникация тармоқлари мижозлари баъзан интернет тезлигининг сустлиги туфайли SIM карталарини бир тармоқдан бошқа тармоққа ўзгартиради, аммо натижа нолга тенг.
Афғонистондаги интернет хизматлари сифати доимо танқид остига олинган. Маълумотларга кўра, Афғонистондаги интернет дунёнинг 137 давлати орасида энг паст тезликка эга.
Изоҳ (0)