UzAuto Motors Chevrolet Onix ва Tracker автомобиллари сотувини тўхтатгани хабар қилинганди. Компания вакили “Дарё”га мазкур русумдаги автомобиллар сотуви жорий ҳафтада тикланишини айтган. Ҳозирда аҳоли нархлари 420 миллион сўмдан 1,1 миллиард сўмгача бўлган Malibu, Equinox, Traverse ва Tahoe машиналарини харид қилиши мумкин.
UzAuto Motors 2022 йилда ҳамёнбоп моделлардан Spark, Nexia, Cobalt ва Lacetti автомобиллари сотувини тўхтатиб, Onix ва Tracker учун шартномалар тузишни бошланганди. Бироқ, жорий йил май ойи бошидан нархи 207 миллион сўмлик Onix ва 211 миллион сўмлик Tracker сотуви тўхтаб қолган. Ҳозирда компаниядан нархлари 420 миллион сўмдан 1,1 миллиард сўмгача бўлган Malibu, Equinox, Traverse ва Tahoe автомобилларини харид қилиш мумкин.
“Autostrada.uz” нашрининг ёзишича, компания ҳамёнбоп моделлар учун шартномалар тузишни тўхтатиш орқали автомобиллар нархларини ошириши мумкин.
“Одатда шартномалар чиқаришни тугатиш инвентаризация ва кейинчалик нархларнинг ошиши вақтида содир бўлади. Охирги 5 йил ичида UzAuto Motors турли баҳоналар билан нархларни оширишдан аввал автомобиллар савдосини тўхтатган”, — дея хабар берган манба.
Компания вакилининг “Дарё”га маълум қилишича, Onix ва Tracker сотилмаётгани мазкур моделлар жиҳозларининг янгиланаётгани билан боғлиқ.
“Tracker ва Onix қўшимча вариантлар билан сотувга чиқарилади. Янги вариантларда иситиладиган ташқи нометалл, олд ўриндиқлар, тозалаш зонаси, иккинчи қатор ўриндиқлари, рул, олти томонлама созланиши ҳайдовчи ўриндиғи, картер ҳимояси, Redline пакети бўлади. Ҳозир янги конфигурациялар бўйича шартномалар очилишига тайёргарлик кўряпмиз”, — дейилади вакил изоҳида.
Қўшимча қилинишича, янги вариантдаги автомобиллар нархлари аввалгисидан фарқ қилади. Аммо машиналар қимматлашиши ёки арзонлашиши тўғрисида маълумот берилмаган. Сотув эса жорий ҳафтада тикланиши кутилмоқда.
UzAuto Motors’нинг ҳамёнбоп нархлардаги автомобилларнинг сотувдан олинишига ижтимоий тармоқ фаоллари ҳам муносабат билдирди.
Иқтисодчи Отабек Бакировнинг ёзишича, ҳозирда нафақат кам даромадли, балки ўрта даромадли аҳолига ҳам автомобиль сотиб олишда танлов йўқолган.
“Энди нафақат кам даромадли ва ўртадан паст, балки, ўрта ва ўртадан юқори даромад эгалари бўлган ўзбекистонликлар ҳам автомобиль сотиб олишнинг танловсиз, ягона вариантидан мосуво бўлишди. Ҳукумат айнан кам ва ўрта бюджетли автомобиллар учун жуда юқори бож тўловлари ва чекловларини белгилаган. Қизиғи, ўзбекистонлик истеъмолчиларга тупуриб қўйган монополист UzAuto Motors эркин бозорлар ҳисобланган Қозоғистон, Қирғизистон ва Озарбойжонда янги ва янги ишлаб чиқариш қувватларини ташкил этмоқда ва кенгайтирмоқда. Ўзбекистонликларга йўқ машина, саналган давлатлар харидорлари учун бор ва бемалол”, — дея фикр билдирган иқтисодчи.
Telegramдаги Davletov.uz канали муаллифи Қобил Ҳидиров шартномалар қайта тикланса, нархлар ошиши мумкинлигини тахмин қилди.
“UzAuto Motors Chevrolet Onix ва Tracker автомобиллари учун шартнома беришни тўхтатган. Компания буни янги комплектациядаги моделлар учун шартномалар тез кунда очилиши билан изоҳлаган. Бунда иситиш тизими опсиялари қўшилиши ва редлайн позициялари назарда тутилган. Афтидан, нархлар яна ошади”, — деб ёзади у.
Компания расмий сайти ёки ижтимоий тармоқлардаги саҳифалари орқали Onix ва Tracker автомобиллари учун шартнома бериш тўхтатилгани, сотув қайта тикланса, нархлар қандай бўлиши ҳақида хабар бермаган.
Маълумот учун, Ўзбекистонда Onix ва Tracker автомобиллари ишлаб чиқарилиши мумкинлиги ҳақида илк бор 2019 йил июнида маълум бўлганди. Onix илк бор сотувга чиққан 2022 йил 1 ноябрь куни автомобиль учун рекорд даражадаги — 28 мингдан ортиқ шартнома имзоланганди. Дастлаб, Chevrolet Onix 9-12 минг доллар атрофида сотилиши хабар қилинган. Аммо шартномалар тўхтатилгунга қадар автомобиль 18 минг доллардан сотилган.
Изоҳ (0)