Қирғизистон президенти Садир Жапаровнинг матбуот котиби Эрбол Султонбоев АҚШ вакилларини мамлакатнинг ички ишларига аралашмасликка чақирди. Бу ҳақда Sputnik хабар берди.
Бишкекнинг Ленинский туман суди Қирғизистон—Тожикистон чегарасидаги воқеалар ҳақида ёлғон маълумот тарқатгани учун Озодлик радиосининг қирғиз хизмати фаолиятини тугатиш тўғрисида қарор қабул қилди. Шу тариқа суд Маданият, ахборот, спорт ва ёшлар сиёсати вазирлигининг даъвосини қаноатлантирди. Озодлик Радиоси мазкур қарор устидан шикоят қилишини билдирди.
“Биз Конгресс Вакиллар палатасининг Халқаро алоқалар қўмитаси раҳбари, шунингдек, АҚШ Давлат департаментининг Озодлик ҳақидаги баёнотлари билан танишдик. Улар бу баёнотларни ҳақиқий вазиятни билмаган ҳолда эълон қилгани аниқ, чунки улар Қирғизистондан узоқда”, — деди Султонбоев.
Унга кўра, Маданият вазирлиги қонунда кўрсатилган ваколатлар доирасида иш олиб борган, сўнгра суд органларига мурожаат қилган ва улар кўриб чиқиш жараёнида тегишли қарорни қабул қилган.
“Мамлакатимизда суд тизими мустақил ва эркин қарор қабул қилади. Унинг ишига ҳеч кимнинг аралашишга ҳаққи йўқ... Қирғизистон очиқ ва эркин давлат, у ерда сўз ва оммавий ахборот воситалари эркинлигига ҳеч қандай чекловлар йўқ. Ҳар бир инсон учун ягона шарт — қонунга қатъий амал қилган ҳолда фаолият юритишдир”, — деди Қирғизистон президенти матбуот котиби.
Изоҳ (0)