Кремль Бахмутни тўлиқ босиб олиш учун 9 май санасини танлади. Россия президенти Владимир Путин шундан сўнг “ғалаба нотаси”ни эълон қилиши мумкин. Бу ҳақда Украина расмийларига таяниб, RBC-Украина хабар берди.
Нашр суҳбатдошларига кўра, бу Россия расмийлари ва армияси учун мантиқий қарор бўлади, чунки Бахмут учун машаққатли жангдан сўнг рус армияси ҳужумни давом эттириш учун кучга эга бўлмаслиги мумкин.
Мисол тариқасида, 2022 йил ёзда Шимолий Донецкдаги аҳоли пунктларининг бир қисми учун машаққатли жанглардан сўнг, рус босқинчиларининг ҳаракати бир неча ойга тўхтатилганди.
Шубҳасиз, Украинанинг бўлажак қарши ҳужуми Россияни босиб олинган ҳудудларни йўқотишига олиб келиши аниқ. Шу сабабли Москва урушнинг тугаши ва “махсус ҳарбий операция” кўзланган “мақсадига эришгани”ни эълон қилиш орқали аллақачон қўлга киритилган ҳудудларни “мустаҳкамлаш”га интилиши мумкин.
Агар Россия қарши ҳужум бошланишидан олдин уруш тугаганини эълон қилса, дунё етакчилари Киевни ҳарбий операцияни бошлаш ўрнига музокарага кўндира бошлаши мумкин, чунки Украина манфаатидан ташқари бўлган ва тинчликка эришишга чорловчи сиёсатчилар бор.
Агар Россия уруш тугаганини эълон қилиб, музокараларни куца, тинчлик тарафдори сиёсатчилар сони сезиларли даражада ошиши мумкин. Шунинг учун Украина қуролли кучларига қарши ҳужуми бошланишидан олдин Москва қандайдир ғалабани эълон қилишига йўл қўймаслик учун Бахмутни ҳимоя қилиш устувор вазифадир.
Изоҳ (0)