Украина раҳбариятининг Қримни қайтариб олиш режалари ҳақидаги баёнотларини эътиборсиз қолдириб бўлмайди, деб ёзди Россия собиқ президенти ва амалдаги Хавфсизлик Кенгаши раҳбари ўринбосари Дмитрий Медведев ўзининг Telegram каналида.
Унинг фикрича, бунга учта йўл билан жавоб қайтариш керак:
- Украина қуролли кучлари томонидан режалаштирилган қарши ҳужумга жалб қилинган “шахсий таркиб ва ҳарбий техникани ёппасига йўқ қилиш” орқали;
- демилитаризация билан Украинада “душманни тўлиқ мағлуб қилиш ва нацистлар режимини тўлиқ ағдариш” орқали;
- Украина раҳбариятининг “асосий фигураларидан” уларнинг жойлашуви ва қанча вақт кетишидан қатъи назар “қасос олиш” орқали.
Медведев Украина президенти Владимир Зеленскийнинг Финляндиянинг Yle газетасида чоп этилган интервьюсига шундай муносабат билдирди. Интервьюда сиёсатчи қарши ҳужум яқинлиги ва Украинанинг Қримни қайтариш режалари ҳақида эълон қилганди. У, шунингдек, Россия билан зиддият йиллар ва ҳатто ўнлаб йилларга чўзилиши мумкинлигидан огоҳлантирди, аммо Россияга Украина ҳудудини беришни истисно қилди.
Аввалроқ Украина мудофаа вазири Алексей Резников ҳарбийларни қарши ҳужумга тайёрлаш якуний босқичда эканини айтганди.
Украина ҳукуматининг қарши ҳужуми баҳор ёки ёзда амалга оширилиши кутилмоқда. Newsweek маълумотларига кўра, ҳужум 30 апрелда бошланиши мумкин. Шу билан бирга, Украина Олий Радаси Ғарб техникаси етарли эмаслиги сабаб ҳужум апрель ойидан номаълум муддатга қолдирилганини маълум қилган.
Изоҳ (0)