Россияда сўнгги 7 йилда Ўзбекистондан келаётган меҳнат муҳожирлари сони ошди

Россияга ишлаш учун келаётган Ўзбекистон фуқаролари сони етти йил ичида тўрт баравар ошди, деб ёзмоқда “ТАСС”.

Россия иқтисодий ривожланиш вазири Максим Решетников етти йил ичида Ўзбекистондан Россияга ишлаш учун келаётган фуқаролар сони тўрт баравар кўпайганини айтган.

Тошкентда бўлиб ўтган халқаро сармоя форумида у Ўзбекистонда фаолият юритаётган Россия компаниялари ҳам кўпайганини таъкидлаган.

“Биз Ўзбекистонда Россия капитали иштирокидаги уч мингта компания фаолият юритаётганини қадрлаймиз, ва бу компаниялар ўзини қулай ҳис қилмоқда”, — деди Решетников.

Шунингдек, у ўтган бир йилда Ўзбекистонда 700 та рус корхонаси очилганини қўшимча қилди.

Маълумот учун Россияга 2022 йилда ишлаш мақсадида келган хорижий фуқаролар сони 3,47 миллион кишини ташкил этди. Мазкур кўрсаткич ўтган йилга нисбатан 33 фоизга кўпдир. Ўзбекистон фуқаролари Россияга келган барча меҳнат муҳожирлари орасида етакчи бўлди — 1,45 млн ўзбекистонлик 2022 йилда Россияга борган. Бу кўрсаткич бир йилда ишлаш учун келган умумий муҳожирлар сонига нисбатан 41,9 фоизни ташкил қилади.

Шунингдек, Ўзбекистон қўшни Қозоғистон республикасини ишчи кучи билан таъминлаш борасида бешинчи ўринда туриши қайд этилган.