Франциялик мутахассис Зинедин Зидан учинчи марта “Реал” бошқарувига тайинланиши мумкин.
Франциянинг Foot Mercato нашри хабарига кўра, Мадрид клуби Зидан билан музокаралар олиб бормоқда. Карло Анчелотти кетадиган бўлса, франциялик мутахассис “Реал”га қайтиши мумкин.
Айни вақтда Анчелоттининг Мадрид клубидаги келажаги номаълум бўлиб турибди. Мутахассиснинг клуб билан амалдаги шартномаси 2024 йилнинг ёзига қадар мўлжалланган. Аввалроқ Карлога Бразилия терма жамоасидан қизиқиш борлиги хабар қилинганди.
Ушбу масала борасида турли манбалар ҳар хил хабар тарқатмоқда. Зидан “Реал”га қайтиш истагида эмас, унинг учун асосий мақсад “Ювентус” бўлиб турибди, деб хабар қилган RMC Sport.
Relevo версиясига кўра, “қаймоқранглилар” Анчелоттига ишонч билан қарамаяпти.
Зидан бунга қадар мураббий сифатида “Реал”да иккита даврни ўтказган (2016—2018 ва 2019—2021 йиллар). Уларда мутахассис клуб билан уч марта Чемпионлар Лигаси ғолиби бўлган, икки мартадан Ла Лига, Испания Суперкубоги, УЕФА Суперкубоги ва клублар ўртасидаги ЖЧ бош совринига эга чиққан.
Изоҳ (0)