Украина ташқи разведка хизматининг собиқ раҳбари генерал Николай Маломуж Россия қуролли кучларини тиклаш учун қанча вақт кераклиги ҳақида гапирди.
Маломужга кўра, ядро қуроли ва учинчи жаҳон уруши бошланиши билан таҳдид қилган Кремль НАТОга аъзо айрим давлатларга сиёсий қарорларини ўзгартириш ва Украинага ҳарбий ёрдам кўрсатиш ҳажмини камайтириш учун босим ўтказмоқчи. Бундай босим орқали Москва Украина раҳбариятини музокаралар столига ўтказишга ва шу орқали жанговар ҳаракатларда зарур бўлган паузага эришмоқчи.
“Муайян ҳисоб-китобларга кўра, уларга захираларни тиклаш, жанговар қобилиятини ошириш ва ҳарбий-саноат мажмуасидан зарур ҳарбий техникани олиш учун олти ой ёки бир йил керак бўлади”, — дея таъкидлайди Маломуж.
Генералнинг сўзларига кўра, бугунги кунда флот, ядровий имкониятлар ва авиация Россияда мавжуд бўлган ягона жанговар кучлардир.
“Путин энг кўп қўрққан нарсага эришди — НАТОнинг кенгайиши ва унинг душманни қайтаришга тайёрлиги. Бугунги кунда алянс Украинани нафақат сиёсий жиҳатдан қўллаб-қувватламоқда, балки ҳарбий ёрдам ҳам кўрсатмоқда. Путин назарида НАТО таҳдиди кўлами кенгайиб бормоқда. Шуни қўшимча қилиш керакки, Украинанинг қарши ҳужумига тайёргарлиги Россия сиёсий раҳбариятини жуда хавотирга солмоқда”, — дея хулоса қилди Маломузж.
Изоҳ (0)