“Глобал маънода қарши ҳужумга тайёрмиз” — Украина мудофаа вазири

Украина мудофаа вазири Алексей Резников ҳарбийларни қарши ҳужумга тайёрлаш якуний босқичда эканини айтди. Бу ҳақда “Украинская правда” хабар берди. 

“Машғулотлар ўз ниҳоясига етмоқда, чунки қурол-яроғ ва ҳарбий техникадан ташқари, ҳарбийларимиз улардан қандай фойдаланишни ўзлаштириши керак. Биз жуда замонавий тизимларни олдик”, — деди Резников.

Украина Мудофаа вазирлиги раҳбари танк коалициясидан ташқари, Украина томони ҳамон Abrams танкларини кутаётганини эслатди.

“Эслатиб қўймоқчиманки, танк коалициясидан (Леопард, Challenger) ташқари, Abrams кейинроқ етказиб берилишини кутамиз. Abrams’дан мазкур қарши ҳужумда фойдаланилмайди. Аммо экипажлар аллақачон машғулотларни ўташга кетган”, — дейди у.

Шунингдек, у уларда кўп сонли турли зирҳли техникалар – бронетранспортёрлар ва пиёда аскарларнинг жанговар машиналари мавжудлигини қайд этди.

“Бу Bradly, Marder, Stryker ва Швециядан CV 90 ни ўз ичига олади. Булардан фойдаланиш бўйича тайёргарлик курслари тугалланмоқда”, — дея тушунтирди Резников.

Украина мудофаа вазири қарши ҳужум ҳақида гапирар экан, армия “глобал маънода тайёр” эканини таъкидлади.

“Мавжуд ускуналар эълон қилинди, тайёрланган ва қисман етказиб берилмоқда. Агар глобал маънода бўлса, биз юқори фоизли режимда тайёрмиз”, — деди у.

Резниковнинг тушунтиришича, Бош штаб қарши ҳужум бошланадиган сана ва жой тўғрисида қарор қабул қилади.