Ўзбекистонлик Бобохўжаева Орзугул (37 ёш) 23 апрелда бўлиб ўтган Токионинг Сетагая округи сайловида депутат этиб сайланди. Бу ҳақда у ўзининг Twitter саҳифасида маълум қилди.
“Бу сафар Сетагая округи мажлиси сайловларида 6771 овоз билан биринчи марта сайландим. Барчангизга раҳмат. Ғолиблик сертификатимни олиш учун Сетагая туман бўлимига бордим. Бизга ишониб топширилган ҳар бир овозни қадрлаймиз”, — деб ёзган у твитида.
Сайлов кампаниясида Бобохўжаева Японияни яхши кўргани учун сукут сақлолмаслигини қайд этган.
“Мен бошқа давлатда туғилганим учун босимга берилмасдан ҳамманинг овозини етказаман”, — деган у.
Бобохўжаева 19 апрель куни сайлов афишаларига шикаст етганини айтган. У ўз плакатининг суратини эълон қилиб, “эълонлар тахтасидаги плакат йиртилган. полиция бармоқ изларини йиғиб, тергов олиб бормоқда”, деб ёзган.
Бироқ у “таъқибларга берилмасдан, Сетагая учун қўлидан келганини қилишда давом этишини” айтган.
Бобохўжаева Японияда 15 йилдан бери истиқомат қилади. У бир нечта ишларда фаолият олиб борган. Жумладан, логистика компаниясида ишлаган, вино компаниясида тадбиркорлик қилган, фрилансер ва ресторан бошқарувчиси ҳисобланади. 2023 йил апрель ойида Япония Конституциявий демократик партияси Сетагая округи ассамблеясига сайловларни расман қўллаб-қувватлаган. Y Company МЧЖ вакили саналади. Оммавий ахборот воситаларида кўплаб чиқишлар қилган.
Изоҳ (1)
Сарлавҳа нотўғри танланган, у аёл энди Ўзбекистонлик эмас. “Япониялик ўзбек аёл депутатликка сайланди” тўғри сарлавҳа бўлса керак