“Рўмол ўрашсин”: Қирғизистонда аёлларга қора бурқа кийишни тақиқлаш таклиф қилинди

Жогорку Кенеш депутати Шарапаткан Мажитова қирғиз аёлларига қора бурқа кийишни тақиқлашга чақирди. Бу ҳақда Sputnik хабар берди.

Парламент йиғилишида Мажитова Ўшга “ижтимоий пакет учун 100 минг сомлик гувоҳнома” тарқатиш учун борганини айтди. Унинг сўзларига кўра, йиғилишга келган аёлларнинг аксарияти бурқа кийган (гап юзни беркитувчи ниқоб ҳақида кетмоқда).

“Ҳамма қора кийимда, фақат кўзлар кўриниб турибди. Ўшда шундай кийинадиган аёллар кўп. Муфтийлар тушунтириш ишларини олиб борсин. Рўмол ўрашсин, лекин қора кийимга ўралишнинг нима кераги бор?”, — деган депутат.

У президент ва Вазирлар Маҳкамасининг парламентдаги вакили Алмас Абитовдан тегишли протокол топшириғини беришни сўраган.