Қирғизистон президенти Садир Жапаров ва Вазирлар Маҳкамаси раҳбари Оқилбек Жапаровнинг парвозлари ҳақидаги ҳар қандай материаллар махфийлаштирилади. Бу ҳақда Қирғизистон парламенти депутати Дастан Бекешев Twitter’даги саҳифасида маълум қилди.
Аввалроқ Қирғизистон раҳбари матбуот котиби Эрбол Султонбоев Bombardier Challenger ёки Embraer Legacy хусусий самолёти ижарага берилишини маълум қилганди.
2023 йил бошида эса аксар қирғизистонлик блогер ва журналистлар Қирғизистон раҳбари хорижий хизмат сафарларига ҳаддан ташқари кўп пул сарфлаётгани ва мамлакат учун оғир иқтисодий вазиятда чартер билан эмас, оддий авиарейслар орқали парвоз қилиш мумкинлиги ҳақида материаллар чоп этганди.
Қирғизистон раҳбари бизнес-жетда парвоз қилганида, унинг фотографи самолёт кадрга тушмаслиги учун президентни махсус бурчакдан суратга оларди.
Аввалроқ, 16 март куни Қирғизистон давлат раҳбари Туркияга Embraer Lineаgе 1000 самолётида парвозни амалга оширганди. Унинг бир соатлик парвози 14 минг доллардан ошган.
Қирғизистон Вазирлар Маҳкамаси раҳбари Оқилбек Жапаров 3 февраль куни хусусий Beechcraft Premier самолёти ёрдамида Олмаотага учиб кетган. Қўшни давлатга бундай парвоз бюджетга 1 миллион 165 минг сомга (13 312 доллар) тушган.
Изоҳ (0)