Туркманистон мудофаа вазири Бегенч Гундогдиев Давлат хавфсизлик кенгаши йиғилишида ҳарбий-тактик ўқув машғулотларига тайёргарлик ҳақида маълумот берди. Бу ҳақда маҳаллий “Олтин Асйр” телеканали хабар бермоқда.
Туркманистон президенти Сердар Бердимуҳамедов, айни пайтда мамлакат Қуролли кучлари Олий қўмондони Туркманистон фақат мудофаавий ҳарбий доктринага содиқлигини айтди.
“Бўлажак машғулотларга пухта тайёргарлик кўриш керак. Шу билан бирга, биринчи навбатда, ҳарбий соҳадаги илғор жаҳон тажрибасини янада ўрганиш ва амалиётга жорий этишга эътибор қаратиш лозим”, — деди у.
Ашхобод мунтазам равишда, жумладан, Каспий денгизида кўргазмали тактик машғулотлар ўтказиб туради. Қуролли кучларнинг барча бўлинмалари: қуруқликдаги қўшинлар, ҳаво кучлари, ҳаво ҳужумидан мудофаа ва денгиз флоти иштирок этган аввалги ҳарбий кўргазма октябрь ойида бўлиб ўтган.
1995 йилдан бери Туркманистон ижобий бетарафлик мақомига эга ва ҳарбий-сиёсий блокларнинг бирортасига ҳам кирмайди. Туркманистон армияси Марказий Осиёнинг бешта давлати ичида Ўзбекистон ва Қозоғистондан кейин Глобал Firepower 2023 ҳисоботига асосан қудрати бўйича учинчи ўринда туради.
Туркманистон Афғонистон (800 км), Эрон (1.148 км), Қозоғистон (458 км) ва Ўзбекистон (1.650 км) билан қуруқликда чегарадош. Каспий денгизида мамлакат Озарбайжон, Эрон, Қозоғистон ва Россия билан чегарадош. Туркманистоннинг денгиз чегарасининг умумий узунлиги 600 километрга яқин.
Изоҳ (0)