“Фарҳод ва Ширин” дуэти хонандаси Ширин дуэт бўлинишига турмуш ўртоғи сабабчи эмаслиги, қўшиқлари муаллифлиги кимда қолиши ва тарқалиш таклифи биринчи марта Фарҳоддан чиққани ҳақида сўзлаб берди.
“Фарҳод эгизагимдек бўлиб қолганди”
Бу тўсатдан бўлиб қолган нарса эмас. Фарҳод анчадан буён яккахон хонанда сифатида ижод қилишни хоҳларди. Икки ой олдин админстраторимиз, мен ва Фарҳод ўтириб гуруҳнинг келажаги ҳақида гаплашдик. Шундан кейин у “Фарҳод ва Ширин” дуэти учун ижод қилмаслигини, ўзи алоҳида хонанда сифатида куйлашини маълум қилди. Биз таклифни қабул қилдик, чунки бу унинг хоҳиши. Ҳеч қачон ҳеч кимни ҳеч нарсага мажбурлаб бўлмайди.
Шу билан ижодни тўхтатдик. Бир йилдан буён яхши ижод қилмаётган эдик. Мен жуда яхши нарсаларни қилишни, кўп нарсалар қилишни хоҳладим, лекин ҳаракатларим унча ўхшамагандан кейин фойдаси йўқлигини тушундим ва ўзимни ўзим тайёрлашга ҳаракат қилдим. Осонмас, 11 йиллик дуэт, Фарҳод эгизагимдек бўлиб қолганди. Қачондир бари бир шу нарса бўларди.
Бизда ҳар доим таваккал бўлган, санъаткор инсонга турмушга чиқдим, турмуш ўртоғим мени тушунди. Мабодо санъаткор бўлмаган инсонга ёки ижодимни тушунмаган инсон билан турмуш қурганимда ижодим ўша пайт тўхтаган бўларди. Ҳамма турмуш қурсам гуруҳдан кетишимга ишонган, турмуш ўртоғим эса ҳар доим мени қўллаб-қувватлаган ва тушунган.
“Мен у билан ижодда хайрлашдим, ҳаётда эмас”
— “Фарҳод ва Ширин” дуэти жойида, яъни админстраторлар, мусиқачилар, ҳаммаси шу ерда, фақат Фарҳод йўқ. Ашулаларга келадиган бўлсак, бу борада тенг ҳуқуқлимиз, муаллифлик ҳуқуқи унда ҳам, менда ҳам бўлади. Ҳозир бизда меники, сеники деган нарса йўқ. Студия Фарҳодда қолади.
Мен у билан ижодда хайрлашдим, ҳаётда эмас, чунки мен ҳаётда ўзимни йўқотиб қўйишни, ундан узоқлашишни истамайман. Қариганимизда ҳам борди-келди бўлишини истайман. Ҳаётда яқинларимни йўқотгим келмайди, — дейди актриса.
.jpg)
“Дуэтнинг бўлиниши турмуш ўртоғимга ҳам бошқача таъсир қилди”
— Турмуш ўртоғим ҳар қандай вазиятда мени қўллаб-қувватлайди. Дуэтнинг бўлиниши турмуш ўртоғимга ҳам бошқача таъсир қилди, чунки улар ҳам санъаткор. Бизни нафақат Ўзбекистонда, балки қўшни давлатларда ҳам яхши кўришади. Ўн бир йил давомида жуда кўп ютуқларга эришганмиз. Фарҳод билан 20 ёшимизда ижодни бошлаган бўлсак, шу ёшдан жуда кўп нарсаларга эришганмиз. Кўпчилик сизлар эришган ютуққа 50 га кирган санъаткор ҳам эриша олмаслиги мумкин, деб айтишади. Турмуш ўртўгим ҳам буни эшитиб ачинди.
Изоҳ (0)