Пентагоннинг махфий маълумотларини тарқатишда гумонланаётган АҚШ ҳарбий-ҳаво кучлари зобити Жек Тейшейра махфий ҳужжатларни Украинада уруш бошланганидан бери дўстлари билан бўлишиб келган. Бу ҳақда The Washington Post нашрига гумонланувчининг танишларидан бири маълум қилди.
Нашр манбасининг айтишича, Тейшейра 2022 йилнинг февраль март ойларида Discord платформасидаги ёпиқ чатида махфий ҳужжатларни нашр этишни бошлаган. Манбанинг таъкидлашича, Тейшейра Украина ва Россия урушидан хафа эканини билдирган, чунки унинг фикрича, “бу икки давлатни бир-биридан ажратиб турадиган нарсалардан кўра, уларнинг умумий жиҳатлари кўпроқ бўлиши керак”.
WP суҳбатдошининг таъкидлашича, Тейшейра ҳужжатларни “ўзи дўст деб билган ва ишонган одамларига” пропагандадан холи маълумот бериш учун улашган. Манбанинг қўшимча қилишича, чат иштирокчилари бу маълумотни 20 кишилик гуруҳдан ташқарига чиқармасликка ваъда берган.
Гумонланувчининг дўсти айтишича, Тейшейра АҚШ миллий хавфсизлигига путур етказишни истамаган, балки шунчаки чат иштирокчиларини вазиятга тўғри баҳо беришга ўргатмоқчи бўлган ва бунинг учун “ўзи билган ягона усул”ни қўллаган.
Тейшейранинг яна бир таниши уни ватанпарвар, диндор католик ва қуролларга қизиқувчи либертар (фуқаролар эркинлигини ёқловчи) деб таърифлади. Шунингдек, нашрнинг аниқлик киритишича, йигит ҳарбий оилада ўсган — ўгай отаси 34 йиллик ҳарбий хизматдан сўнг нафақага чиққан, онаси эса узоқ йиллар фахрийларга ёрдам кўрсатувчи ташкилотларда ишлаган.
ФҚБ ходимлари Жек Тейшейрани 13 апрель куни Массачусетс штатида ҳибсга олди.
The New York Times газетасининг ёзишича, йигитни ўнлаб йиллик қамоқ жазоси кутаётган бўлиши мумкин, чунки у тарқатган ҳар бир махфий ҳужжат катта эҳтимол билан, ишда алоҳида айблов сифатида кўрсатилади — уларнинг ҳар бири учун Тейшейра 10 йилгача қамалиши мумкин. Йигит жами нечта ҳужжатни тарқатгани номаълум. Reuters 50 дан ортиқ махфий ҳужжатларни ўрганган, бироқ уларнинг умумий сони юздан ортиқ бўлиши мумкинлигини тахмин қилмоқда.
Изоҳ (0)