Қирғизистоннинг Балиқчи шаҳрида, Иссиқкўлдан унча узоқ бўлмаган жойда эски қабристон ўрнига истироҳат боғи ва масжид қурилади.
Мазкур ташаббус қабр ва ёдгорликларни бузиш учун овоз берган маҳаллий аҳоли томонидан ҳам маъқулланган. Боғнинг қурилишига шаҳар ҳокимлиги томонидан кўмак берилади. Ушбу майдон текисланади, кейин боғ ва 9000 кишига мўлжалланган масжид қад ростлайди.
Шаҳар ҳокими Арнабек уулу Азаматнинг сўзларига кўра, қабристонни бузиш 2016 йилда режалаштирилган. Шундан сўнг 2 марта жамоатчилик муҳокамаси ўтказилган ва учинчисида йиғилганлар уни бузишга қарор қилган.
“Қабристоннинг ўзи 1940 йилда очилган бўлиб, охирги дафн 1972 йилда амалга оширилган. Ярим асрдан кўпроқ вақт ўтган бўлса, бу жойдан бошқа эҳтиёжлар учун фойдаланиш мумкин. Бу ҳам қонуний, ҳам диний томондан жоиздир”, — дея қўшимча қилди у.
Санитария меъёрларига кўра, қабристонни кўчиришда жойларни қайта ишлаш керак. Шу билан бирга, турар жой майдонини ташкил қилиш учун бундай ҳудудлардан тупроқ олиш қатъиян ман этилади. Бундай жойлардан фойдаланиш 30 йил ўтгач ва фақат яшил майдонлар учун рухсат берилади.
Изоҳ (0)