Афғонистоннинг Сарипул вилоятида мажбурий никоҳ сабабли 15 ёшли қиз ўз жонига қасд қилди. Бу ҳақда маҳаллий манбаларга таяниб, Hasht-e Subh Daily хабар берди.
Манбаларга кўра, қиз Кўҳистон туманида истиқомат қилган. Унинг отаси қизни 700 минг афғони (8 минг доллар) эвазига мажбурлаб унаштирган. 15 ёшли қизнинг исми Фаҳима бўлиб, у аввалроқ отасини никоҳдан воз кечмаса, ўз жонига қасд қилиши ҳақида огоҳлантирган. Отаси унинг сўзларига эътибор бермаган, оқибатда қиз жонига қасд қилган.
Маълумот ўрнида, Афғонистоннинг Парвон вилоятида 22 ёшли қиз мажбурий никоҳ сабабли тўйи куни ўз жонига қасд қилганди. Марҳума Калашников автоматидан ўзига ўқ узган. Ҳодиса Шайх Али туманидаги Турий қишлоғида содир бўлган. Қизнинг оиласи уни розилигисиз бир эркакка унаштириб қўйгани, шунинг учун ҳам тўй куни у ўз жонига қасд қилгани аниқланган.
Мажбурий никоҳ, оиладаги зўравонлик ва руҳий муаммолар Афғонистонда аёлларнинг ўз жонига қасд қилишининг асосий сабаблари сифатида кўрилмоқда.
Аввалроқ “Толибон” ҳаракатининг расмий вакили Афғонистонда мажбурий никоҳ тақиқланганини маълум қилганди. Тақиқ асосида Қундуз вилоятида 50 ёшли эркакнинг 12 ёшли қизни мажбуран никоҳига олишига рухсат берилмаган. Ҳолат юзасидан айбдорлар қўлга олинган, улар суд жараёнини кутмоқда. “Толибон” тақиққа риоя қилмаганлар қонуний жавобгарликка тортилишини маълум қилган.
Изоҳ (0)