Тошкентнинг Сергели туманида аёл уч нафар фарзанди билан 9-қаватдан ташлаб, ҳалок бўлганди. Бош прокуратура ҳолат юзасидан қўшимча маълумот берди.
Олиб борилган текшириш ҳаракатлари натижасига кўра, аёл Зангиота туманида турмуш ўртоғи билан истиқомат қилган хонадонда 2022 йил октябрида ёнғин содир бўлгани сабабли онасининг Сергели 8-мавзесидаги уйига келиб, улар билан бирга истиқомат қилиб келган ҳамда ушбу ҳолатлар унинг руҳиятига салбий таъсир кўрсатган.
Унинг турмуш ўртоғи ҳозирда Саудия Арабистонида умра зиёратида экани аниқланган.
3 апрель куни соат 19:20 ларда аёл (1996 йилда туғилган) икки нафар ўғли ва бир нафар қизини қасддан ўлдириш мақсадида, 9-қаватдан бирин-кетин деразадан ташлаб юбориб, сўнгра ўзи ҳам ойнадан сакраб ўз жонига қасд қилган. Оқибатда барчаси ҳодиса жойида вафот этган.
Мазкур ҳолат юзасидан Жиноят кодексининг 97 (қасддан одам ўлдириш) ва 103 (ўзини ўзи ўлдириш даражасига етказиш) моддалари билан жиноят иши қўзғатилган.
Тергов гуруҳи томонидан ушбу фожианинг барча эҳтимолий сабабларини синчиковлик билан текшириш мақсадида қатор тергов тахминлари ишлаб чиқилган. Хусусан, оилавий келишмовчилик, марҳумада кузатилган руҳий ўзгаришларга олиб келган сабаблар, ўз-ўзини ўлдириш даражасига келтириш ва бошқа тахминларнинг барчаси дастлабки тергов жараёнида батафсил текширилади.
Изоҳ (0)