Ҳаёт паст-баландликлар, қувончли ва ғамгин кунлардан иборат. Машҳур инсонларнинг ҳаёти ҳам бундан мустасно эмас. “Севимли” телеканалининг “Машҳурлар” лойиҳасида бир гуруҳ аёл санъаткорлар иштирок этиб, ўзлари учраган автоҳалокатлар ҳақида сўзлаб берди.
Малика Равшанова: “Авариядан кейин 8 йил рулга ўтиролмаганман”
— 2008 йил Жиззахга тўйга кетаётганимизда, жиддий йўл-транспорт ҳодисасига учраганмиз. Яъни йўлдан эшак чиқиб қолган. Биз кетаётган машина ҳайдовчиси уни уриб юбормаслик учун машинани четга олган. Бахтга қарши машина бетон тўсиққа бориб урилган. Ўшанда машинанинг ярми йўқ бўлиб кетганди. Ундан кейинги воқеаларни эслолмайман. Кўзимни очганимда Тошкентга олиб келишганини айтишганди. Бир ярим ой давомида ўрнимдан турмай даволанганман. Чунки умуртқам жиддий шикастланган эди. Шу воқеадан кейин 8 йил рулга ўтиришга қўрққанман. Турмуш ўртоғим хориж сафарларида кўп бўлгани учун машина ҳайдашга мажбур бўлганман. Агар шу мажбурият бўлмаганида, рулга ўтириш фобиямга айланиб қолган бўларди, — дейди Малика Равшанова.
Наргиз Яндашева: “Йўлдаги ҳаракат фақат сизга боғлиқ эмас”
— Яқинда жуда қўрқинчли вазиятга тушдим. Ўғлим ва жияним билан машинада кетаёцак, катта юк машинаси йўлдан чиқиб, машинамни қисиб қўйди. Қўрқиб кетдим, ўзимдан аввал ўғлим ва жияним ҳақида ўйладим.
Тартибли ҳайдовчиман, машинани эътибор билан бошқаришга ҳаракат қиламан. Аммо рулда фақат мен эмас, атрофдагилар ҳам эътиборли бўлиши кераклигини англадим, — дейди хонанда.
Раъно Ярашева: “Оёқларим синиб, юзларим кўкариб кетган”
— 2006 йили уйимизни таъмирлаётгандик, пул етмай машинамни сотишга тўғри келди. Машинасиз қийналганимдан кейин Matiz русумидаги арзонроқ машинани кредитга олдим. Nexia’да юришга ўрганиб қолган эканманми, бир куни Matiz кичик дўнгалакдан ўтолмай бошим томга урилганди. Жаҳлим чиқиб ўз-ўзимга “Matiz яхши машина эмас экан”, дегандим. Орадан ҳеч қанча вақт ўтмай автоҳалокатга учраганман. Энг қизиғи, ўша пайтда “Севинч” фильмидаги қаҳрамонимни машина уриб юборгач, оёғи синиб, юзлари кўкариб кетган ҳолатда кўрсатган эдик. Ҳақиқий автоҳалокатдан сўнг икки оёғим синиб, юзимнинг бир томони кўкариб кетганди. Мана шу воқеадан кейин машина темир бўлса-да гапни тушунишини англаганман. Шунинг учун машиналарга оғир гапирмай, қайси русумдаги машинага чиқсам ҳам “сен энг яхшисисан” деб мақтайман, — дейди Раъно Ярашева.
Хосият Ҳусанова: “Ўлдим деб ўйлаганман”
— 2008 йили мудҳиш аварияга учраганман. Аммо бу менинг эмас, бошқа ансамблдаги ҳайдовчининг айби билан содир бўлган. Бахтга қарши мен ҳам ўша машинада эдим. Мен Damas’нинг олд ўриндиғида эдим. Чилонзорда кетаётганимизда у Nexia’га урилиб, рулни бошқаролмай дарахтга урилган. Ўша пайтдаги аҳволимни тасвирлаб беролмайман, “Ўлдим”, деб ўйлаганман. Мени машинадан олиб чиқишлари жуда қийин кечган. Икки қўлимдан бир неча марта тортишгач нафас ола бошлаганман. Менга кучли мия чайқалиши ва умуртқа поғонасининг жиддий шикастланиши ташхисини қўйишган. Бир йил тўшакка михланиб, 2-гуруҳ ногиронига айланганман. Ҳозир аҳволим анча яхшиланган, аммо кечга яқин оғриқларим зўраяди, — дейди Хосият Ҳусанова.
Изоҳ (0)