Юлдуз Усмоновадан Алишер Файзгача — Қўқонда машҳурлар иштирокида ўтказилган “Конституция ўзимизники” тарғибот тадбиридан фоторепортаж

Қўқон шаҳрида ёшлар ташаббуси билан “Конституция меники, сеники, бизники! Конституция ўзимизники” шиори остида Конституциявий қонун лойиҳаси бўйича тарғибот тадбири ва концерт-шоу дастури бўлиб ўтди. Бу ҳақда “Дарё” мухбири Азизжон Эрматов хабар берди.

Қўқон мусиқали драма театри очиқ майдонида ўтказилган тадбирда шаҳардаги олий таълим муассасалари талабалари ҳамда маҳаллаларда яшовчи минглаб ёшлар иштирок этди.

Ўзбекистон халқ артисти Юлдуз Усмонова, Ўзбекистон халқ шоири Иқбол Мирзо, Қўқон давлат педагогика институти профессори Зебо Қобилова, Ўзбекистон давлат санъат ва маданият институти Фарғона минтақавий филиали директори Шамсиддин Усмонов ўз чиқишларида Конституцияга киритилаётган ўзгаришлар, уларнинг афзалликлари ҳақида гапирди.

Тадбир давомида янгиланаётган Конституция тўғрисида, шунингдек, референдум ўтказиш тартиби, унда иштирок этиш бўйича ёшлар ташаббуслари, таклифлари илгари сурилди.

Концерт дастури тарзида ўтказилган тарғибот тадбирида санъаткорлар, мамлакатнинг таниқли шахслари сўз олиб, Қўқон аҳлини конституция ислоҳотларида фаол бўлишга ва 30 апрелга белгиланган референдумда иштирок этишга чақирди.

Конституциявий қонун лойиҳаси бўйича тарғибот тадбирлари республиканинг барча ҳудудларида ўтказилиши режалаштирилган.