Қашқадарёда туман ҳокими рўзадорларни сув ичишга мажбурлагани айтилмоқда
Қашқадарё вилояти Косон тумани ҳокими ўзи чақирган мажлисда рўзадорларни рўзасини очишга мажбурлагани айтилмоқда. Бу ҳақда Ўзбекистон Инсон ҳуқуқлари “Эзгулик” жамияти раиси Абдураҳмон Ташанов Facebook’даги саҳифасида хабар берди.
Абдураҳмон Ташановга кўра, 31 март куни соат 15 ларда мажлис чақирган Қашқадарё вилояти Косон тумани ҳокими Асрол Бойқораев қишлоқ хўжалигидаги муаммолар ҳақида жуда ғазаб билан гапирган. Шундан сўнг ходимларга мажлисда “Сенлар рўза тутволиб, сипо бўлиб юрасанлар. Ишни ким қилади?”, деб сув келтиришни буюрган.
Бунга қадар ижтимоий тармоқларда Асрол Бойқараев билан боғлиқ кўплаб маълумотлар тарқалганди.
2021 йилда унинг хизмат автомобили туман марказида бир фуқарони уриб юборгани, оқибатда фуқаро вафот этгани хабар берилди. Сўнгра мазкур ЙТҲgа ҳокимнинг биринчи ўринбосарини олиб юрувчи ҳайдовчи айбдор экани, ЙТҲ содир бўлган пайтда автомобилда ҳоким бўлмагани маълум қилинди. Аввалроқ эса Асрол Бойқараевнинг қамоққа олингани ёзиб чиқилди. Бунга муносабат билдирган ҳокимлик ахборот хизмати “тасдиқланмаган, ваҳима ва шов-шув учун тарқатилаётган ёлғон хабарларга ишонманг”, деди. Бироздан сўнг Telegram’даги каналларнинг бирида Косон тумани ҳокими Асрол Бойқараевнинг матбуот котибига ўзини тез-тез ёритиб туришини сўрагани, охирги маротаба уни матбуот котиби қутқариб қолгани айтилган хабар тарқалди. Косон ҳокими матбуот котиби Дилшод Набиев эса мазкур хабарни ҳам рад этди.
