Давлат солиқ қўмитаси ер ва мол-мулк солиғи ҳақида юборилаётган хабарномалар бўйича изоҳ берди
Ўзбекистонда айрим фуқаролар ер ва мол-мулк солиғи ҳақида ДСҚ томонидан юборилган хабарномаларни фирибгарларнинг яна бир тузоғи сифатида қабул қилди. Қўмита бунга муносабат билдирди.
Қайд этилишича, солиқ тўловчилар уяли телефонларига 6079 рақамидан юборилган ҳисобланган ер ва мол-мулк солиғи ҳақидаги хабарноманинг ҳаволасига босилганда фойдаланувчи банк картасидан пул ечиб олиниши тўғрисида ижтимоий тармоқларда тарқалаётган хабарлар асоссиз.
“Аслида Солиқ қўмитаси солиқ тўловчиларга қулайлик яратиш мақсадида уларнинг уяли телефонларига 6079 рақамидан ҳисобланган ва тўланиши лозим бўлган ер ва мол-мулк солиқлари тўғрисидаги маълумотларни SMS кўринишида юбормоқда”, — дейилади хабарда.
Қўмитанинг билдиришича, “Батафсил” ёзувидаги ҳавола орқали тўлов хабарномаси юкланади. “Тўлаш” ёзуви босилганда эса “Солиқ” мобил иловаси жойланган платформа (Play Маrket) очилади. Агар илова фойдаланувчи қурилмасига ўрнатилган бўлса илованинг “Солиқларни тўлаш” ойнасидан тўловни тез ва осон амалга ошириш мумкин.
