Бош прокуратура Хоразмда меҳрибонлик уйи қизларига нисбатан содир этилган жинсий жиноят бўйича суд ҳукми ва апелляция инстанцияси ажримларининг қонунийлиги ўрганилганини маълум қилди.
Зўравонликка қарши курашувчи “Немолчи.уз” лойиҳаси Хоразм вилоятида 3 нафар меҳрибонлик уйи тарбияланувчиси 10 ой давомида вилоят Адлия бошқармаси бошлиғи ва туман фавқулодда вазиятлар бўлими бошлиғи томонидан зўрлаб келинганини хабар қилганди.
Жиноят ишлари бўйича Хива туман судининг 2022 йил 6 сентябрдаги ҳукмига кўра, меҳрибонлик уйи мудирасига 5 йил-у 6 ойга озодликдан маҳрум қилиш жазоси тайинланган. Ёш болалар билан жинсий алоқада бўлган икки масъулга эса 1,5 йилга озодликни чеклаш жазоси белгиланган.
Бош прокуратура берган маълумотга кўра, судланган А.Машарипов ва А.Курязовларга енгил жазо тайинлангани ва бошқа ҳолатлар юзасидан 29 март куни Олий суд жиноят ишлари бўйича судлов ҳайъати кассация инстанцияси судига протест келтирилган.
Аввалроқ ушбу ҳолат юзасидан муносабат билдирган Президент администрацияси шўба мудири Саида Мирзиёева қонунчиликда жиддий муаммолар борлиги ва ушбу бўшлиқдан жирканч шахслар фойдаланиб қолаётганини алоҳида қайд этиб, Бош прокуратурадан мазкур ҳолатга алоҳида эътибор қаратиб, синчиклаб ўрганишни ва ҳуқуқий баҳо беришни сўраганди.
Президент администрацияси раҳбари ўринбосари Комил Алламжонов педофилларга нисбатан кимёвий кастрация жазосини қўллаш юзасидан қонунчиликка ўзгартириш киритиш вақти келганини айтганди.
Болалар омбудсмани ҳам меҳрибонлик уйи қизларига нисбатан қўлланадиган ҳар қандай жинсий жиноятларга оғир жазо турларини қўллаш керак, деган позицияда.
Изоҳ (2)
Конунчиликда Бош прокуратурага кадар суд карорларига протест киритадиган туман ва вилоят прокуратураларига хукмни конунийлигини урганиш ва протест киритиш вазифа ва ваколатлари белгиланган. Нима учун бу идоралар шу кунга кадар буни килмаган, нега яширган. Бу органларни масулиятсизлигига Ким жавоб беради ё улар хам жиноятга шарики?
Adolat xolasinikida