Таълим соҳасига оид ҳужжатларга апостил қўйишни тезлаштириш учун қўшимча тўлов ундирилмайди
Ўзбекистонда таълим соҳасига оид ҳужжатларга апостил қўйишни тезлаштириш учун қўшимча тўлов ундирилаётгани ҳақида хабарлар тарқалди. Билимни баҳолаш агентлиги ҳолат юзасидан муносабат билдирди.
Қайд этилишича, президентнинг 2022 йил 21 декабрдаги фармони билан Таълим сифатини назорат қилиш давлат инспекцияси тугатилиб, унинг вазифа ва функциялари Мактабгача ва мактаб таълими вазирлиги ҳамда Олий таълим, фан ва инновациялар вазирлиги орасида тақсимланиши белгиланган.
Шу сабабли ўрта махсус касб-ҳунар, профессионал, олий ва олий таълимдан кейинги таълим соҳасига оид ҳужжатларга апостил қўйиш билан боғлиқ мурожаатлар 2023 йил 17 февралдан бошлаб агентлик томонидан кўриб чиқилмоқда. Мурожаатлар Вазирлар Маҳкамаси томонидан тасдиқланган Регламентга мувофиқ 2 иш кунида (айрим ҳолларда 10 иш кунигача) кўриб чиқилмоқда.
Мазкур қарорда апостил қўйиш учун базавий ҳисоблаш миқдорининг 20 фоизи (2023 йил 1 апрель ҳолатига 60 минг сўм) миқдорида йиғим ундирилиши белгиланган бўлиб, ундирилган йиғим тегишлилиги бўйича 4 та ташкилот ўртасида тақсимланади. Талабгорлардан бундан бошқа ҳеч қандай тўлов талаб этилмайди. Маълумотларга кўра, турли фирмалар томонидан жарайонни тезлаштириб бериш учун фуқаролардан пул сўраш ҳолатлари кузатилмоқда.
“Агар кимдир сиздан ҳужжатларга апостил қўйиш учун қўшимча тўлов сўрайдиган бўлса, уларга ишонманг. Ҳужжатларга апостил қўйиш учун БҲМнинг 20 фоизидан ортиқ тўлов талаб этилмайди. Жарайонни тезлаштириб берамиз деб пул сўраётганлар сизга ҳеч нарса қилиб бермайди, шунчаки, пулингизни олади холос. Шу сабабли, апостил қўйиш бўйича турли фирмаларга мурожаат қилмасдан, ўзингиз 3 хил усулда ариза беришингиз мумкин. Булар Билимни баҳолаш агентлиги, Давлат хизматлари марказларига бориш ва Ягона интерактив давлат хизматлари порталига (my.gov.uz сайти) онлайн ариза топшириш орқали амалга оширилади”, — дейилади хабарда.
