Пентагон: Украина ҳозирча ATACMS ракеталарини олмайди, аммо бошқа вариантлар бор
АҚШ Украинага ATACMS узоқ масофага учувчи ракеталарни етказиб беришга ҳозирча тайёр эмас, аммо Украина Қуролли кучларига Россия билан жанг майдонида кўпроқ имкониятлар беришнинг бошқа вариантларини кўриб чиқмоқда. Бу ҳақда АҚШ штаб бошлиқлари бирлашган қўмитаси раҳбари, генерал Марк Милли Defence One нашрига берган интервьюсида айтиб ўтди.
Унинг таъкидлашича, украиналикларга ATACMS бермаслик тўғрисида сиёсий қарор мавжуд. “Ҳарбий нуқтаи назардан, бизда ATACMS ракеталари нисбатан кам ва биз ўз ўқ-дориларимиз захираси етарли эканига ишонч ҳосил қилишимиз керак”, — тушунтирди Милли.
“Қуролларнинг масофасига келсак, менда ATACMS нима қила олиши ва қила олмаслиги ҳақида айрим муболағалар бор ... ATACMS масофаси узоқроқ, аммо худди шундай масофани таъминлайдиган бошқа тизимлар ҳам бор”, — деди генерал.
Марк Милли аниқлик киритишича, худди шундай имкониятларга эга дронлар ва “британияликларнинг бир нечта тизимлари бор”.
“Шундай экан, уларга (Украина ҳарбийларига) қандайдир афзаллик беришимиз мумкин бўлган яна бир қанча вариантлар бор. Аммо айнан ҳозир ATACMS’ни бермоқчи эмасмиз” , — дея қўшимча қилди АҚШ штаб бошлиқлари қўмитаси раҳбари.
Маълумот учун, ATACMS ракеталари 300 километргача бўлган нишонни йўқ қила олади.
Reuters АҚШ 3 апрель куни Украинага 2,6 миллиард долларлик янги ҳарбий ёрдам пакетини эълон қилиши ҳақида хабар берганди. Пакет олти турдаги ўқ-дориларни, жумладан, аниқ бошқариладиган авиация ўқ-дориларини ва бошқа нарсаларни ўз ичига олиши кутилмоқда.
