Фарғонада Қирғизистондан келтирилган психотроп моддалар савдоси билан шуғулланганлар ушланди

ДХХнинг Фарғона вилояти бўйича бошқармаси ходимлари томонидан гиёҳвандлик воситаларининг ноқонуний айланмасига қарши тезкор тадбирлар ўтказилди, деб хабар беради ЎзА.

Хусусан, Фарғона туманида яшовчи 1993 йилда туғилган, муқаддам судланган шахс қирғизистонлик таниши билан 4 минг дона “Трамадол”, 5,3 минг дона “Регапен” ва 32 дона “Тропикамид” кучли таъсир қилувчи дори воситаларини сотиб олишга келишган. У мазкур дори воситалари учун олдиндан 1,2 минг доллар берган, қолган пулларни эса дориларни сотиб бўлганидан кейин бермоқчи бўлган.

Ўз навбатида қирғизистонлик наркосавдогарлар унинг буюртмасини айланма йўллар орқали Ўзбекистон ҳудудига ўтказиб беради. Ушбу шахс Риштон туманига бориб, 2,8 минг дона “Трамадол”, 560 дона “Регапен” ва 10 дона “Тропикамид” кучли таъсир қилувчи дори воситаларини Қўқон шаҳрида яшовчи 1989- ва 1990 йилда туғилган икки харидорга 13 миллион сўм ҳамда 100 долларга сотиб, Қўқон—Фарғона йўналишида ҳаракатланаётганига ушланган.

Шунингдек, ушбу фуқародан гиёҳвандлик воситаларини сотиб олган қўқонлик икки харидор ҳам қўлга олиниб, улардан ҳам ашёвий далиллар тегишли тартибда олиб қўйилган.

Бундан ташқари, наркосавдогарнинг кўрсатмаси асосида унинг яшаш хонадонидан товарнинг қолган қисми — 600 дона “Трамадол”, 4,7 минг дона “Регапен”, 172 дона “Тропикамид” процессуал тартибда расмийлаштирилган.

Ўтказилган тезкор тадбир давомида умумий баҳоси 1,5 миллиард сўмни ташкил этувчи гиёҳвандлик воситалари мусодара қилинди.

Бошқа бир ҳолатда эса Риштон туманида яшовчи 1987 йилда туғилган аёлнинг яшаш хонадони кўздан кечирилганда келгусида сотиш мақсадида Қирғизистондан келтирилган 682 миллион сўмлик 3,3 минг донадан зиёд “Регапен”, минг донадан ортиқ “Тропикамид” расмийлаштириб олинган.

Шунингдек, аёлнинг жиноий шериги бўлган Қўқон шаҳрида яшовчи 1986 йилда туғилган фуқаро ҳам ушланган.

Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.

Аввалроқ Андижонда Қирғизистондан олиб келинган гашишни 1,6 минг долларга сотмоқчи бўлган 37 ёшли аёл ушлангани тўғрисида хабар берилганди.