АҚШ президенти Жо Байден Британия қироли Чарльз III нинг 6 майга белгиланган тож кийиш маросимига бормайди, деб хабар берди The Telegraph манбалари. Бунга ёш билан боғлиқ муаммолар сабаб бўлаётгани айтилмоқда. Байденнинг ўрнига рафиқаси Жилл Буюк Британияга келиши мумкин.
Манбага кўра, хорижий саёҳатлар Америка президентидан “жуда кўп энергия олади”. “Улар асосий нарсаларга эътибор қаратишга уринмоқда ва қисқа вақт ичида Атлантикани иккинчи марта кесиб ўтиш борасида икки марта ўйлаётган бўлиши мумкин”, — деди The Telegraph манбаси.
Британия газетаси таъкидлашича, Қўшма Штатлар Байденнинг ўрнига энг юқори мартабали вакилларини, жумладан, биринчи хоним Жилл Байденни юборишга тайёр.
Тадбирда иштирок этадиган давлат раҳбарлари орасида Ирландия, Франция, Испания, Бельгия, Япония, Венгрия ва Монако раҳбарлари, шунингдек, Еврокомиссия раиси Урсула фон дер Ляйен, Европарламент раҳбари Роберта Метсола ва Европа кенгаши раиси Шарл Мишел бўлади.
Жо Байден 11 апрель куни Шимолий Ирландиядаги Белфаст шаҳрига келади. У Белфаст келишуви имзоланганининг 25 йиллигига бағишланган тадбирларда иштирок этади. Унда Байден Чарльз III билан учрашиши мумкинлиги тахмин қилинмоқда. Шундан сўнг, Байден апрель ойи ўрталарига қадар Дубльинга боради.
Изоҳ (0)