“Украина ғалабани яқинлаштирадиган фаол ҳаракатларга тайёрланмоқда” — Зеленский

Украина президенти Владимир Зеленский мамлакат ғалабасини яқинлаштирадиган фаол ҳаракатларга тайёрланаётганини айтди. У урушнинг 400 кунлиги билан халққа қилган мурожаатида бу ҳақда гапирди.

“Тўлиқ миқёсдаги тажовуздан ҳимоя қилишимизнинг тўрт юз кунлиги. Бу биз босиб ўтган улкан йўл. Украина учун курашган ва курашаётган, украин халқи учун қайғурган ва қайғураётган, логистикамизга ёрдам берган ва ёрдам бераётган, Украина барқарорлигини мустаҳкамлаган ва мустаҳкамлаётганлар — ҳаммамиз биргамиз”, — деди Зеленский.

Сиёсатчи Украина 2022 йил февраль ойининг энг оғир кунларини ўтказганини, бу қишдан омон қолганини таъкидлади. У шимолий ҳудудларнинг баҳорги озод этилиши тасодиф эмаслигини айтди.

“Киев, Чернигов, Суми вилояти учун жанг... Харков туманларининг қайтиши, Херсоннинг қайтиши, Бахмут ва Донбасснинг мудофааси — бу украиналикларнинг қаҳрамонлиги, уни дунё унутмайди. Биз кейинги қадамларни, фаол ҳаракатларимизни тайёрлаяпмиз. Ғалабамиз яқинлашишига тайёрланаяпмиз”, — деди у.

Шунингдек, Зеленский Украина урушда ғалаба қозониши, чунки эркинлик ва адолат, инсонийлик ва ҳурмат, халққа муносиб бўлган тинчлик ғалаба қозониши кераклигини айтди.