Американинг The Wall Street Journal газетаси ўз мухбири Эван Гершковичнинг Екатеринбургда ҳибсга олинишига бағишланган редаксион мақола чоп этди. Россия Федерал хавфсизлик хизмати америкалик журналистни жосусликда айбламоқда.
Таҳририят Жо Байден маъмуриятини журналистни озод қилишга, шунингдек, Россия билан “дипломатик ва сиёсий кескинлашув” имкониятини кўриб чиқишга чақирди.
“Россиянинг АҚШдаги элчиси ва бу ерда ишлаётган барча россиялик журналистларнинг чиқариб юборилишини кутиш мумкин бўлган минимал иш бўлади. АҚШ ҳукуматининг биринчи вазифаси ўз фуқароларини ҳимоя қилишдир, ҳозирда жуда кўп ҳукуматлар америкаликларни қўлга олиш ва қамаш мумкин, бу жазосиз қолади, деб ўйламоқда”, — дейилади мақолада.
WSJ журналистларининг фикрича, Гершковичнинг ҳибсга олиниши “Кремлнинг америкаликларни гаровга олиш одатини кучайтиради ва Россия цивилизациялашган давлатлар ҳамжамиятидан ажралиб бораётганига яна бир далил бўлади”.
“Президент Владимир Путин энди Эван Гершковичнинг саломатлиги ва хавфсизлиги учун жавобгардир”, — деб ёзади The Wall Street Journal.
Эван Гершкович 29 март куни Екатеринбургда қўлга олинган. Россия Федерал хавфсизлик хизмати The Wall Street Journal журналисти Россия ҳарбий-саноат мажмуаси корхоналаридан бири ҳақида махфий маълумотларни тўплаганини даъво қилмоқда. Кремлнинг қўшимча қилишича, Гершкович “жиноят устида ушланган”. 30 март куни Лефортово суди журналистни жосусликда айблаб, ҳибсга олишга рухсат берди. Жиноят кодексининг 276-моддасига кўра, Гершкович 10 йилдан 20 йилгача озодликдан маҳрум этилиши мумкин.
Meduza маълумотларига кўра, WSJ мухбири журналистик материал устида иш олиб бориш учун Екатеринбург ва Нижний Тагил шаҳарларида бўлган. Екатеринбурглик пиар мутахассиси Ярослав Ширшиковнинг айтишича, Гершкович шаҳарга маҳаллий аҳолининг “Вагнер” гуруҳи ва Россиянинг Украинадаги “махсус операцияси”га муносабати ҳақида материал ёзиш учун келган. Ширшиков журналистга Екатеринбургда ҳамроҳлик қилган ва уни мақоланинг айрим қаҳрамонлари билан таништирган.
Эван Гершкович қарийб олти йилдан бери Россияда яшайди ва Американинг The Wall Street Journal газетасининг Москвадаги бюросида ишлайди. Журналист Россия Ташқи ишлар вазирлиги томонидан аккредитация қилинган. Илгари Гершкович Agence Francе-Presse, The Moscow Times ва The New York Times газеталарида ишлаган. Гершковичнинг охирги мақоласи 28 март куни The Wall Street Journal нашрида чоп этилган.
Изоҳ (0)