Путин Россия ташқи сиёсатининг янги концепциясини тасдиқлади
Россия президенти Владимир Путин ташқи сиёсат концепциясининг янги таҳририни тасдиқлади. У Россия Федерацияси Хавфсизлик кенгашининг доимий аъзолари билан учрашувда тегишли фармонни имзолаганини маълум қилди. Бу ҳақда “ТАСС” хабар берди.
Ушбу ҳужжат мамлакатнинг халқаро фаолиятининг устувор йўналишлари, мақсад ва вазифаларини белгилайди, у Россия Ташқи ишлар вазирлиги ва бошқа вазирлик, идоралар учун йўл харитаси бўлади.
“Россия ўзини рус дунёсининг таянчи ва глобал мувозанатни сақлайдиган ўзига хос сивилизацион давлат сифатида белгилайди”, — дейилади концепцияда.
АҚШ Россияга қарши ҳаракатларнинг асосий йўлбошчиси деб қаралган. Концепция халқаро ҳаёт доирасини белгилашда Ғарбнинг монополиясини тўхтатиш зарурлигини ҳам назарда тутади. Россия хавфсизлигига “дўстона бўлмаган” давлатлар томонидан таҳдидлар “экзистенсиал” деб тан олинган. Бундан ташқари, Россия ва унинг иттифоқчиларига қуролли ҳужумни қайтариш ёки олдини олиш учун қуролли кучлардан фойдаланиш тезислари киритилган.
Қуйида янгиланган концепциянинг асосий тезислари келтирилган:
- Россия ўзини Ғарбнинг душмани деб ҳисобламайди ва ўзини ундан ажратиб қўймайди;
- Москва Ғарб давлатларининг қарама-қаршилик бефойдалигини англаб етишига ва тенг ҳуқуқли ҳамкорликка қайтишига умид қилмоқда;
- Россия Вашингтонни ўз хавфсизлиги ва халқаро тинчлик учун хавфларнинг асосий манбаи деб билади;
- АҚШнинг дунёдаги ҳукмронлиги қолдиқларини йўқ қилишга устувор аҳамият берилади;
- Москва барча мамлакатлар учун ўзаролик тамойили асосида хавфсизликни тенг таъминлашга интилади;
- Хитой ва Ҳиндистон билан алоқаларни ҳар томонлама чуқурлаштириш ва мувофиқлаштириш алоҳида аҳамиятга эга;
- Яқин хориждаги асосий мақсад минтақани тинчлик, яхши қўшничилик ва фаровонлик ҳудудига айлантиришдир.
Биринчи марта Россия ташқи сиёсати концепцияси 1993г йилда тасдиқланган, кейин у қайта-қайта янгиланган. 2016г йилги концепцияда Россия ташқи сиёсатининг вазифалари орасида “жаҳон ҳамжамиятидаги мустаҳкам позицияларни сақлаш ва мустаҳкамлаш”, шунингдек, “қўшни давлатлар билан яхши қўшничилик муносабатларини шакллантириш” ўрин олганди. Путин 2022 йил 28 январь куни Хавфсизлик кенгаши аъзолари билан концепцияни янгилаш масаласини муҳокама қилди.
