Шавкат Мирзиёевнинг топшириғи асосида мамлакатда оғир касалликларга чалинган минглаб беморларда мураккаб операцияларни ўтказиш учун қарийб 90 миллиард сўм ажратилди. Соғлиқни сақлаш вазирлиги ушбу маблағлар сарфланиши бўйича маълумот берди.
Қайд этилишича, юқори технологик амалиётларнинг сарфлов воситалари нархи бутун дунёда қиммат. Масалан, сон суяги, елка, тизза бўғимларининг емирилиши билан боғлиқ хасталикларни даволашда қўлланиладиган эндопротез мосламалари баҳоси Ўзбекистонда ўртача 18-20 миллион сўмга тенг.
Акция доирасида соғломлаштириладиган беморлар икки тоифага ажратилган.
Биринчи гуруҳ — туғма юрак нуқсонидан азият чекаётган болалар. Уларнинг сони — 2 минг нафар. Барчаси ижтимоий ҳимояга муҳтож оилаларнинг 18 ёшгача бўлган фарзандлари.
Ана шу ўғил-қизлар жами 64 миллиард сўмдан зиёд маблағ эвазига навбатсиз, имтиёзли йўлланмасиз, энг малакали шифокорлар томонидан юқори технологик операциялар орқали оғир дарддан халос этилади.
Жарроҳлик амалиётлари Болалар миллий тиббиёт маркази, академик В.Воҳидов номидаги Республика ихтисослашган хирургия илмий-амалий тиббиёт маркази, Тошкент педиатрия тиббиёт институти клиникаси, Самарқанд, Наманган, Фарғона, Андижон вилоятлари болалар кўп тармоқли тиббиёт марказлари, Республика ихтисослаштирилган кардиология илмий-амалий тиббиёт маркази Урганч филиалида ўтказилмоқда.
Иккинчи гуруҳга мансуб беморлар — катталар. Уларда бажариладиган тезкор операциялар учун давлат 22 миллиард сўм ажратган.
Беморлар рўйхати тегишли ишчи гуруҳ, жойлардаги Халқ қабулхоналари, маҳалла фаоллари иштирокида, хонадонма-хонадон ўрганишлар натижасида адолатли равишда шакллантирилган.
“Бу тоифага имтиёзли йўлланмага эга беморлар киритилмади. Негаки, уларнинг даволаниш сарф-харажатлари шундоқ ҳам давлат томонидан қопланади. Муолажалар даври, тиббиёт муассасалари белгилаб қўйилган. Демак, уларни соғломлаштиришда муаммолар юзага келмайди”, — дейилади ССВ хабарида.
Ҳозир акция доирасида моддий имконияти чекланган беморларда эндопротезлаш, кардиохирургик, урологик, эндокринологик ва ички аъзоларни кўчириб ўтказиш каби ноёб ва мураккаб операциялар ўтказиш бошланган.
Изоҳ (0)