Сенатнинг Ёшлар, маданият ва спорт масалалари қўмитаси томонидан Болалар масалалари бўйича миллий комиссия ҳамраисининг 2022 йилда амалга оширилган фаолияти юзасидан ахбороти эшитилди.
Қайд этилишича, болаларнинг ҳуқуқлари, эркинликлари ва қонуний манфаатларини таъминлаш, уларнинг жисмоний, интеллектуал, маънавий ва ахлоқий камол топишига кўмаклашиш юзасидан муайян ишлар амалга оширилган.
Миллий комиссия ва ҳудудий комиссиялар томонидан 5497 та муҳокама ўтказилиб, уларда болаларнинг ҳуқуқларини ҳимоялаш бўйича 12 422 та иш кўриб чиқилган. 1104 та идора ва ташкилотнинг болалар ҳуқуқларини ҳимоя қилиш, қонуний манфаатларини таъминлаш борасидаги фаолияти ўрганилган ва уларга нисбатан 493 та тақдимнома киритилган.
Болаларни тарбиялаш ва уларга таълим бериш борасидаги мажбуриятларни бажармагани учун 5 227 нафар ота-она маъмурий жавобгарликка тортилган, 2054 нафар болага ҳамда 1306 нафар ота-онага якка тартибда профилактик иш олиб борилиши белгиланган. Оилалар ва болалар муассасаларига қаровсиз ва назоратсиз қолган 11 162 нафар бола жойлаштирилган.
Ота-оналик ҳуқуқини суиистеъмол қилгани, болаларни тарбиялашдан, уларнинг ҳуқуқ ва манфаатларини ҳимоя қилишдан бош тортгани учун 652 нафар боланинг ота-онаси ота-оналик ҳуқуқидан маҳрум этилган. Ижтимоий тармоқларда тарқалган болаларнинг ҳуқуқлари ва манфаатларини камситувчи 29 та ҳолат юзасидан тегишли назорат ўрнатилган.
Ўз вақтида туғилганлик гувоҳномасини олмаган 412 нафар болага гувоҳнома берилган. Бундан ташқари, 528 нафар бола гувоҳнома олмагани аниқланиб, бу борада тегишли чоралар кўрилмоқда. Меҳрибонлик уйлари, болалар шаҳарчаси ва SOS болалар маҳаллалари уюшмаси қарамоғидаги етим болалар ва ота-она қарамоғидан маҳрум бўлган болалар оилаларга, яқин қариндошлари тарбиясига ўтказиш натижасида 13 та меҳрибонлик уйига, 4 та болалар шаҳарчаси ва 4 та болалар уйига эҳтиёж қолмагани учун уларнинг фаолияти тугатилган.
Уй-жойга муҳтож етим болалар ва ота-она қарамоғидан маҳрум бўлган болалар учун 2022 йилда 397 та уй-жой харид қилинган. Шу мақсадда бюджетдан 57 млрд сўм маблағ йўналтирилган. Етим болалар ва ота-она қарамоғидан маҳрум бўлган болаларнинг орзу-истакларини рўёбга чиқаришга кўмаклашиш бўйича “Меҳр дафтари” тизими йўлга қўйилиб, жамғармага 86,1 млрд сўм маблағ ажратилган.
Мажлис сўнгида мавжуд камчиликларни ҳал этиш, айниқса, 2023–2030 йиллар давомида Ўзбекистонда ота-она қарамоғидан маҳрум бўлган болаларни жойлаштириш тизимини деинститусионализация қилиш бўйича Миллий стратегия ҳамда тегишли Ҳаракатлар режасини тасдиқлаш ҳамда унинг ижросини таъминлаш бўйича масъул ижрочилар билан яқин ҳамкорликда фаолият олиб бориш юзасидан тегишли қўмита қарори қабул қилинди.
Изоҳ (0)