Кариб денгизида Антигуа ороли яқинида 81 миллион долларлик ҳашаматли Alfa Nero яхтаси топилди. Бу ҳақда Insider хабар берди.
Мазкур яхтанинг Кариб денгизидалигига 18 ойдан ошди ва у маҳаллий ҳокимият вакилларида катта қизиқиш уйғотмоқда. Айрим манбалар яхтада Владимир Путин билан алоқадор россиялик олигарх саёҳат қилган бўлиши мумкинлигини даъво қилмоқда. Айни дамда Антигуа ва Барбуда ҳукумати агар 31 мартгача ҳеч ким яхтага эгалик ҳуқуқини даъво қилмаса, у сотилишини айтди.
“Антигуа ва Барбуда ҳукуматига қиймати 50 миллион доллардан ортиқ бўлган мазкур 267 футлик яхтани сотиб олиш бўйича таклифлар келиб тушган”, — дейилади хабарда.
Alfa Nero деб номланган яхтада спорт зали, сартарошхона ва катта бассейн мавжуд. АҚШ Молия вазирлиги яхтани россиялик олигарх Андрей Гурев билан боғлаган, департамент уни Россия президенти Владимир Путиннинг “яқин ҳамкори” деб атаган.
.jpg)
“ФосАгро” ўғит компанияси асосчиси ва бойлиги 10,1 миллиард долларга тенг бўлган Гуревга Украина уруши даврида Кремл билан алоқаси учун АҚШ, Буюк Британия ва Европа Иттифоқи томонидан санкция қўйилган.
Гуревнинг қонуний вакили кема олигархга тегишли эмаслигини айтди.
“Антигуа ҳукуматига маълум қилганимиздек, жаноб Гурев Alfa Nero’га эгалик қилмайди ва уни назорат қилмайди, 2014 йилдан бери вақти-вақти билан кемадан тижорий чартер сифатида фойдаланилмоқда”, — деган олигарх вакили.
Расмийлар яхта сотувидан тушган пулни Антигуа яхта клуби бандаргоҳига ёқилғи учун бўлган 500 минг доллар қарзини тўлаш учун ишлатмоқчи. Қолгани Антигуа ва Барбуда ривожланиши учун ишлатилиши керак.
Таъкидланишича, яхта экипажини боқиш учун пул етишмай қолган, сабаби яхта Кариб денгизидаги мамлакатда 18 ойдан ортиқ вақтдан бери бўлган. Яхта Антигуа бандаргоҳи учун ҳам хавф туғдириши айтилмоқда.
Alfa Nero ҳам суғурталанмаган бўлиши мумкин ва бу бандаргоҳ учун муаммоларни келтириб чиқаради.
“Гап ўша бандаргоҳдаги миллиардлаб долларлик активлар ҳақида кетмоқда. У кема ёниб кетса, нима бўлишини тасаввур қилишингиз мумкин”, — дейилади хабарда. Alfa Nero боғланган Фалмут бандаргоҳи ҳашаматли яхталар учун марказдир.
Изоҳ (0)