АҚШ ортидан яна бир давлат фуқароларини Россияни тарк этишга чақирди 

Польша Ташқи ишлар вазирлиги матбуот котиби Лукаш Ясина мамлакат фуқароларини Россияни тарк этишга чақирди. У тегишли мурожаатни Twitter'даги саҳифасига жойлади.

Польша мулозими Россия хавфсизлик хизмати The Wall Street Journal мухбири Эван Гершковични ҳибсга олиши фонида Варшаванинг 2022 йил фуқароларига Россияга бормаслик ва унинг ҳудудини тарк этиш тавсиясини эслатди. Спикер Ташқи ишлар вазирлигининг 2022 йил 3 мартдаги баёнотини эълон қилди. Унда Польша фуқаролари Украинадаги вазият туфайли Россия ҳудудида бўлиш ва мамлакатга саёҳат қилиш хавфи ҳақида огоҳлантирилган.

“Бу, айниқса, Эван Гершковичнинг ҳибсга олиниши ҳақидаги маълумотлар контекстида муҳим”, — дея таъкидлаган Ясина.

Эслатиб ўтамиз, 30 март куни америкалик журналист Гершкович Россиянинг Екатеринбург шаҳрида “жосуслик”да айбланиб ҳибсга олинди. The Wall Street Journal журналистга нисбатан айбловларни рад этиб, уни озод қилишни сўради. Журналист 20 йилгача қамоқ жазосига ҳукм қилиниши мумкин.

АҚШ давлат котиби Энтони Блинкен ҳам бунга муносабат билдириб, Америка фуқароларини зудлик билан Россияни тарк этишга чақирди.