Андижон вилояти прокуратурасида прокуратура органлари томонидан 2022 йилда амалга оширилган ишларга бағишланган матбуот анжумани ўтказилди. Бу ҳақда “Дарё” мухбири хабар бермоқда.
Иқтисодий жиноятларга қарши курашиш департаменти вилоят бошқармаси ходими Исақжон Ғозибоевнинг маълум қилишича, 2022 йилда вилоятда салкам 72 миллиард сўмлик бюджет маблағлари ноқонуний ўзлаштирилганлиги аниқланиб, шундан 22,5 миллиард сўми ундирилган.
“Бошқарма ва унинг ҳудудий бўлимлари томонидан бюджет маблағларини растрата ва ўзлаштириш йўли билан талон-торож қилиш, ноқонуний сарфлаш, ижтимоий соҳада лойиҳаларни амалга ошириш доирасида ажратилган бюджет маблағларини ўзлаштириш ҳолатларини аниқлаш борасида жами 163 та жиноят иши қўзғатилган. Қўзғатилган жиноят ишлари доирасида 71,9 миллиард сўмлик зарар аниқланиб, шундан 22,6 миллиард сўми ундирилган.
Давлат харидларини амалга оширишда нархларни ошириб юбориш билан боғлиқ 68 та ҳолатда давлат бюджет ига 23,8 миллиард сўмлик зарарлар аниқланиб, 5 миллиард сўми ундирилган”, — дейди Исақжон Ғозибоев.
Қўшимча қилинишича, субсидия маблағларини талон-торож қилиш ва коррупция ҳолатлари билан боғлиқ жами 21 та жиноят иши қўзғатилган бўлиб, шундан 6 та коррупция ҳолати аниқланган. Қўзғатилган жиноят ишлари бўйича давлат бюджетидан ажратилган 2,8 миллиард сўмлик субсидия маблағларини талон-торож қилинганлиги аниқланиб, 604,6 миллион сўми ундирилган. Шунингдек, “Обод маҳалла” ва “Обод қишлоқ” давлат дастурлари асосида амалга оширилган қурилиш ишлари бўйича 24 та жиноят иши қўзғатилган бўлиб, улар натижасида 5,29 миллиард сўмлик зарар аниқланиб, 1,5 миллиард сўми ундирилган.
Изоҳ (0)