Афғонистоннинг Жузжон вилояти Қўштепа туманидаги қизларнинг бошланғич мактабида портлаш содир бўлди. Бу ҳақда Hasht-e Subh Daily хабар берди.
Маълум қилинишича, мактабдаги синфлардан бирида граната портлаган, оқибатда икки ўқувчи қиз ҳалок бўлган, 11 нафар қиз эса яраланган. Маҳаллий манбалар портлаш 29 март куни содир бўлганини маълум қилди. Аммо граната синфга қандай олиб кирилгани ҳақида маълумот берилмаган.
“Толибон” хавфсизлик гуруҳининг Жузжондаги вакили Абдулсаттор Ҳалимий мазкур хабарни тасдиқлади. У портлаш оқибатида 10 ва 12 ёшли икки қиз ҳалок бўлгани, олти киши жароҳатланганини айтди.
Унинг сўзларига кўра, ўқувчи қизлар граната топиб, у билан ўйнаб ҳалок бўлган ва яраланган. Жузжондаги айрим манбаларнинг фикрича, қизлар мактабидаги портлаш қизларнинг бошланғич мактабларини ёпишни истаган “Толибон” аъзоларининг иши бўлиши мумкин.
Афғонистонда “Толибон” ҳокимиятга келганидан сўнг кўплаб қизларнинг мактабга боришини тақиқлаган, 2022 йил декабрида эса Олий таълим вазирлиги аёлларнинг олий маълумот олишига тақиқ жорий қилган. Бу қарор “Толибон” ҳукумати орасида норозиликка сабаб бўлган, қаршилик шу даражада жиддийлашганки “Толибон”нинг юқори мартабали амалдорлари Охундзодани тахтдан ағдаришни кўриб чиқмоқда.
Изоҳ (0)