“Толибон” ҳаракатининг қочқинлар масалалари бўйича вазири вазифасини бажарувчи Халил ар-Раҳмон Ҳаққоний Афғонистон ҳукуматини ағдаришда Россия, Америка ва НАТОга аъзо давлатлар рол ўйнаганини айтди. Бу ҳақда Etilaatroz хабар берди.
.jpg)
Ҳаққоний Пактия вилоятидаги учрашувда ушбу мамлакатлардан Афғонистонда ўнлаб йиллар давом этган уруш оқибатида қурбонлар ва иқтисодий йўқотишлар сабабли афғон халқига товон тўлашни талаб қилди. Россия, Америка ва НАТО аъзолари ўнлаб йиллар давомида Афғонистоннинг турли вилоят ва ҳудудларида қурол-яроғ қўллаган ҳолда шафқатсиз ҳужумлар олиб боргани таъкидланди.
“Толибон” расмийси бу ҳужумларнинг қурбони бўлган инсонларга компенсация тўланиши кераклигини билдирди. Шунингдек, Ҳаққоний юқоридаги давлатларни Афғонистоннинг ички ишларига аралашиш ва унга қарши санкцияларни давом эттиришда айблади.
Маълумот ўрнида, “Толибон” ҳаракатининг мазкур баёнотни эълон қилган мулозими Халил ар-Раҳмон Ҳаққонийни Вашингтон энг хавфли террорчилардан бири сифатида 2001 йилда қидирувга берганди. Ўшанда Америка томони унинг қаердалиги ҳақидаги маълумот учун 5 миллион доллар тўлашга тайёрлигини билдирган.
Изоҳ (0)