Россияда урушга қарши расм чизган 6-синф ўқувчиси Маша Москалёванинг отаси Алексей Москалёв икки йиллик колонияга ҳукм қилинди. “Медиазона” хабарига кўра, бундай қарор Тула вилояти Ефремов туманлараро суди томонидан қабул қилинган. У Россия армиясини қайта-қайта “обрўсизлантириш” моддаси бўйича судланган. Судья, шунингдек, Москалёвнинг қизи ижтимоий хизматлар қарамоғига ўтказилаётганини эълон қилди. Прокуратура Москалёвга нисбатан икки йиллик қамоқ жазосини талаб қилган.
Москалёвнинг ўзи ҳукм эълон қилинган мажлисда иштирок этмаган. Суд матбуот котиби Олга Дячукнинг айтишича, у ҳукм чиқарилишидан олдинги кун, 27 март кечаси “уй қамоғидан қочиб кетган”.
2022 йил апрель ойида Маша Москалёва расм дарсида “Урушга йўқ” ва “Украинага шон-шараф” ёзувлари билан урушга қарши расм чизган эди. Расмда болани ракеталардан ҳимоя қилаётган аёл ва Украина байроғи тасвирланган. Дарсдан кейин эртаси куни полиция Москалёв ва мактабдан унинг қизини олиб кетди. Бўлимда у “Одноклассники” ижтимоий тармоғидаги аккаунти номидан ёзилган “Россия армияси. Жиноятчилар ёнимизда” изоҳи туфайли унга қарши армияни “обрўсизлантириш” бўйича протокол тузилганини билди. Ушбу протоколга кўра, суд Москалёвни 32 минг рубль миқдорида жаримага тортди.
Алексей Москалёв ва унинг қизи Федерал хавфсизлик хизмати томонидан сўроқ қилинган. Машани отасининг иши бўйича суднинг эртасига махсус хизматлар олиб кетган. Маша мактабга боришни тўхтатган ва уйдан ўқишга ўтган. 2022 йил 30 декабрда уларнинг уйи тинтув қилинган.
Москалёвнинг сўзларига кўра, тинтув ўтказилган куни эрталаб унинг уйи олдида бешта полиция машинаси, шунингдек, Фавқулодда вазиятлар вазирлиги ва ўт ўчириш хизмати машиналари келиб тўхтаган. Унинг айтишича, ФХХ ходимлари шкафдаги нарсаларни чиқариб, кийимларни оёқости қилган, деворлардан расмларни йиртиб ташлаган ва мебелларни ағдарган. Улар барча жиҳозлар, шунингдек, оиланинг барча жамғармалари — 125 минг рубль ва 3 150 долларни тортиб олишган. Сўроқ пайтида хавфсизлик кучлари ундан: “Долларни қаердан олдингиз? Хўжайинингиз ким? Ким учун ишлайсиз?” деган саволларни сўраган.
Москалёвнинг сўзларига кўра, сўроқ пайтида хавфсизлик кучлари унга куч ишлатган. Шундан сўнг у қизи билан Узловая шаҳрига кетишга қарор қилган. Шаҳар Тула вилоятида, Москалёвлар яшаган Ефремовдан 100 километр узоқликда жойлашган.
Алексей Москалёв 1 март куни ҳибсга олинди, унга қарши “Одноклассники”да Буча аҳолиси ва асирга олинган украиналикларнинг ўлдирлиши ҳақида ёзилган изоҳлар туфайли армияни қайта-қайта “обрўсизлантириш” айби билан жиноий иш очилган. Ишга айнан қандай изоҳлар сабаб бўлганига Тергов қўмитаси ўз ҳисоботида аниқлик киритмаган. 2 мартдан бери Москалёв уй қамоғида сақланган.
Маша Москалёва вояга етмаганлар марказига олиб кетилди. Ота қизи билан алоқада эмас. Маълум бўлишича, январь ойида Ефремов шаҳрининг Вояга етмаганлар ишлари бўйича комиссияси Москалёв ва қизнинг онасини ота-оналик ҳуқуқидан маҳрум қилиш бўйича судга мурожаат қилган. Комиссия раҳбари Светлана Давидованинг сўзларига кўра, 2022 йилнинг май ойидан бери Москалёвлар оиласи “ижтимоий хавфли вазиятдаги оилаларнинг профилактик рўйхати”да. У қизнинг отаси икки марта маъмурий жавобгарликка тортилгани ва қизини мактабга қайтаришга уринмаганини, онаси эса алоҳида яшагани ва унинг ҳаёти билан қизиқмаслигини таъкидлади.
Ота-оналик ҳуқуқидан маҳрум қилиш бўйича суд мажлиси 6 апрелга белгиланган.
Суд Алексей Москалёвнинг жиноий ишини бир кун ичида — 27 мартда кўриб чиқди. Прокурор айбланувчини икки йилга озодликдан маҳрум қилишни сўради. Суд мажлисида Москалёв жиноий ишга сабаб бўлган изоҳларни у ёзмаганини айтди. Унинг айтишича, “Одноклассники”даги саҳифаси бир неча бор хакерлик ҳужумига учраган.
Суд жарайонида Москалёв қисқа нутқ сўзлади: “Агар сиз ҳозир Украинадаги ъмахсус операцияъга қандай муносабатда эканимни сўрасангиз, менимча, ҳатто залдаги одамларнинг 90 фоиздан кўпроғи ҳам бунга қарши. Ва мен уларга қўшиламан. Ўлимга, одамларнинг ўлимига қандай муносабатда бўлиш мумкин? Катталар, болалар ўлмоқда. Фақатгина салбий муносабат, урушга яна қандай муносабатда бўлиш керак? Лекин негатив нарсаларни, ҳақоратларни ёзиш ҳақида гап кетаётган бўлса ... буни мен қилмадим”.
Ҳукм чиққан 28 март куни Москалёвнинг адвокати Владимир Билиенко Маша истиқомат қилаётган бошпана ходимлари билан гаплашишга муваффақ бўлди. Унга қизнинг расмларини беришган, шунингдек, отасига аталган хатни кўрсатишган. “Охирида катта юрак чизилган ва шундай сўзлар ёзилганди: ’Дада, сиз менинг қаҳрамонимсиз’”, — деди адвокат.
Изоҳ (0)