Айни вақтда президент Шавкат Мирзиёев раислигида Қорақалпоғистон Республикаси Кегейли туманида йиғилиш бўлиб ўтмоқда. Бу ҳақда “Дарё” мухбири хабар берди.
Давлат раҳбари Қорақалпоғистон маҳаллаларини обод қилиш, сув, йўл, электр таъминотини яхшилаш, мактаб, боғча ва тиббиёт пунктларини қуриш ва таъмирлаш учун 2023 йилда 1,5 триллион сўм берилаётганини таъкидлади.
Бундан ташқари, 452 та маҳалладаги шароити оғир 21 мингта хонадон таъмирланади, 709 та уйлар янгитдан қуриб берилади. Бунга бюджетдан 132 миллиард сўм, Тошкент шаҳри ва вилоятлардан 232 миллиард сўм ажратиляпти.
Президент Қорақалпоғистон аҳолиси фаровонлигини янада оширишга қаратилган 3 та янги ташаббусни айтиб ўтди.
“Қорақалпоғистондаги 452 та маҳалланинг ҳар бирига тўғридан-тўғри 500 миллион сўмдан қўшимча маблағ ажратилади. Бунинг учун алоҳида Қорақалпоғистон маҳаллаларини қўллаб-қувватлаш жамғармаси ташкил қилиниб, унга жорий йилда 250 миллиард сўм ажратамиз. Муаммони маҳалланинг ўзи кўтарсин, ўзига пул берайлик, ўзи назорат қилсин. Шунда сифат ва манфаат бўлади. Одамлар рози бўлади”, — деди Шавкат Мирзиёев.
Президент ўзига ҳудудлардан уй-жойлар кадастри масаласида жуда кўп мурожаатлар бўлишини айтди.
“Қорақалпоғистонда ҳам 47 минг уй-жой ва кўчмас мулкларнинг кадастри йўқ. Бу – одамларимизни ипотека олиш, томорқасида деҳқончиликка кредит, субсидия олиш, яшаётган бошпанасини фарзандларига мерос қолдириш имкониятини чеклаяпти. Кўп ўйлаб, Қорақалпоғистон аҳолисига шу масалада енгиллик яратмоқчиман”, — деди давлат раҳбари.
Президент Жўқорғи Кенгес раисига икки ойда 38 минг одамнинг қўлига кадастри тўлиқ қилиб бериш юзасидан топшириқ берди.
Давлат раҳбари ўзи сўзида давом этар экан, Қорақалпоғистонда йилига 6,5-7 мингта уй-жойга талаб борлигини алоҳида қайд этди.
“Шу боис, 2023 йил ўтган йилга нисбатан 2 баравар кўп ёки 4 мингта уй-жой қурилади. Бунга қўшимча қилиб, фақат Қорақалпоғистон аҳолиси учун янги имконият яратамиз. Яъни, замонавий лойиҳа асосида 4 минг якка тартибдаги уй-жой қуришга 4 сотихдан ер ажратилади. Инфратузилмасини ҳам қилиб берамиз. Бундай имкониятни бошқа ҳудудларимизга бермаганмиз”, — деди давлат раҳбари.
Изоҳ (0)