Путин армияга баҳорги чақирув тўғрисидаги фармонни имзолади

Россия президенти Владимир Путин армияга баҳорги чақирув тўғрисидаги фармонни имзолади. Ҳужжат ҳуқуқий ахборотнинг расмий интернет порталида эълон қилинди.

“2023 йил 1 апрелдан 15 июлгача Россия Федерациясининг 18 ёшдан 27 ёшгача бўлган, захирада бўлмаган ва муддатли ҳарбий хизматга чақирилиши керак бўлган фуқароларини 147 минг киши миқдорида муддатли ҳарбий хизматга чақириш амалга оширилсин”, — дейилади фармон матнида.

Россияда 2022 йилнинг кузида 120 минг, 2022 йилнинг баҳорида эса 134,5 минг киши ҳарбий хизматга чақирилган.

30 март куни Давлат думаси мудофаа қўмитаси раиси Андрей Картаполов Россия армиясида ҳарбий хизматга чақирилган россияликлар Донецк ва Луганск, шунингдек, Запорожье ва Херсон вилоятларига хизматга юборилмаслигини айтганди. Шунингдек, у федерациянинг янги субъектларида баҳорги муддатли ҳарбий хизматга чақирув бўлмаслигини айтганди.